DILI, 16 marsu 2023 (TATOLI)- Governu Portugal liuhosi ninia Sekretáriu Estadu Asuntu Edukasaun Portugál, António Leite, promete sei kontinua fó apoiu ba dezenvolvimentu Eskola Centro e Formação e Aprendizagem Escolar (CAFE) iha Timor-Leste.
António Leite, hato’o asuntu ne’e bainhira halo audiénsia ho Prezidente Parlamentu Nasionál, Aniceto Longuinhos Guterres Lopes, akompaña husi Prezidente Komisaun G ne’ebé trata asuntu Edukasaun no Sidadania, Deputadu Antonio Verdial, iha sala konferénsia Parlamentu Nasionál, kinta ne’e.
Notísia Relevante :DNDPE kontinua konstrusaun foun eskola CAFE lima iha tinan 2023
Nia dehan, Governu Portugal observa no akompaña prosesu aprendizajen lian portugués iha Timor-Leste (TL) ne’ebé hari’i liu husi kooperasaun serbisu entre Estadu Timor-Leste no Portugál hatudu maiória prosesu aprendizajen hosi Eskola Portugués Ruy Cinatti Balide no Eskola CAFE iha munisípiu sira dezenvolve ho di’ak.
“No iha futuru mai, liu husi kooperasaun ne’ebé iha ona atu buka dalan oinsá hodi habelár eskola CAFE iha munisípiu Ataúro, inklui posibildade atu kontinua apoiu no hadi’a prosesu aprendizajen língua portugués iha Timor-Leste,” Governante portugués hateten.
Iha fatin hanesan Prezidente komisaun G, Antonio Verdial, husu atu Portugál tulun nafatin Timor-Leste iha área edukadaun nian, liu husi eskola CAFE ne’ebé estabelese ona iha territóriu tanba liu husi eskola CAFÉ konsege promove kapasidade estudante no manorin na’in sira barak maka ko’alia lian portugués durante prosesu aprendizajen ne’e la’o.
Alende ne’e, reprezentante povu hosi partidu KHUNTO ne’e mós husu atu bele fo apoiu ensinu pre-eskolár no apoiu espesifíku ba estudante defiénsia.
“Ida ne’e sira hatete sira sei tulun Timor-Leste ho sustentabilidade nafatin, tanba Timor-Leste hanesan nasaun maun alin,” Nia hateten.
Notísia Relevante :Profesór timor-oan 219 hanorin iha Eskola CAFE
Jornalista: Nelson de Sousa
Editór: Agapito dos Santos