HEADLINE, SAÚDE

Frederico Bosco: Susuk iha tipu rua mak transminte moras dengue ba ema

Frederico Bosco: Susuk iha tipu rua mak transminte moras dengue ba ema

Susuk aedes aegypti. Imajen hosi google

DILI, 17 marsu 2023 (TATOLI) – Diretór Nasionál Saúde Públika iha Ministériu Saúde, Frederico Bosco dehan susuk iha tipu rua mak ne’ebé transmite moras dengue ba ema iha teritóriu nasionál.

“Pasiente sira afeta moras dengue barak, ne’e mai husi susuk Aedes Aegypti no Aedes Albopictus, entaun ema ida bele hetan moras tanba susuk ne’e lori virus no tata, entaun ema hahú dezenvolve sinál sintoma dengue nian”, Frederico Bosco hateten ba TATOLI.

Nia dehan, moras ne’e daet, laos diretamente maibé husi ema ida mak ba ema seluk, entaun ida ne’e mak akontese ba ema hodi to’o ba fasilidade saúde sira.

“Moras ne’e daet, laos diretamente maibé liuhosi ema ba ema seluk tanba susuk mak sai hanesan meiu atu transmite virus dengue, entaun lori ema to’o moras baixa iha fasilidade saúde ne’ebé mak ita iha”, nia afirma.

Susuk Aedes Aegypti  no Aedes Albopictus ne’ebé tata ema moras, entaun susuk sira ne’e ninia forma diferente ho susuk seluk ne’ebé daet moras seluk hanesan malaria tanba moras malaria mós daet husi susuk naran anopheles, entaun sira ne’e tipu la hanesan.

“Atu halo protesaun ba ita-nia an atu susuk labele tata ita mak hamoos iha fatin sira ne’ebé mak ita hela ba toba iha musquiteriu laran, kose replente atu bele hadook aan hosi moras maibé komunidade barak mak ladún tau atensaun ba ida ne’e”, nia informa.

Nia akresenta, fatór seluk ne’ebé hetan moras mak haree ba ema nia imunidade atu hetan moras dengue tanba ema balun susuk tata la dezenvolve moras maibé balun ne’ebé imunidade fraku hetan moras, entaun ida ne’e dependénsia ba sira nia saúde hotu.

Jornalista : Felicidade Ximenes

Editór : Zezito Silva

iklan
iklan

Leave a Reply

iklan
error: Content is protected !!