DILI, 20 marsu 2023 (TATOLI) – Banku Nasionál Komérsiu Timor-Leste (BNCTL), prontu apoia setór privadu sira hodi halo investimentu iha setór oioin hodi dezenvolve nasaun.
“Ami dehan ba emprezariu timoroan hotu katak difikuldade sempre iha, maibé se ita bele buka dalan atu rezolve. Ba oin BNCTL iha kapasidade atu bele fó apoiu ba setór privadu hodi investe saida de’it mak iha ita-nia rain laran presiza”, Prezidente Konsellu Administrasaun BNCTL, António Vítor, hatete hafoin partisipa iha inaugurasaun aviaun Aero Dili, iha Aeroportu Internasionál Prezidente Nicolau Lobato, Comoro, segunda ne’e.
Apoia ne’ebé BNCTL fó mak hanesan ba empreza Aero Dili hodi investe iha setór aéreu hodi hatama aviaun ho bandeira Timor-Leste.
“Ajuda ne’ebé fó ba empreza Aero Dili ba investimentu sira operasional ninian. Investimentu iha aviaun ne’e di’ak tanba aumenta tan kapasidade semo ba rai-li’ur no mai Timór. Ho aumenta aviaun ninia folin konserteza sei kompetitivu”, dehan.
Nia afirma, ho apoia sira ne’e hanesan meiu ida ne’ebé Governu liuhosi BNCTL komesa fó atensaun ba setór privadu sira.
“Apoia ne’ebé BNCTL fó entermu finansiamentu, maibé hanesan empreza foin hahú mós iha ninia kbiit natoon no banku aumenta tan hodi realiza mehi. Ami labele temi montante osan tanba ami iha regra hodi regula”, nia dehan.
BNCTL ajuda ona empreza timoroan ne’ebé investe iha área marítima hanesan sosa ró, seluk mak empreza Aero Dili no tempu badak sei apoia tan empreza sira atu investe iha área terrestre.
Atu apoia investimentu ba setór privadu, Governu mós disponibiliza ona verba ho montante millaun 50 ne’ebé transfere ona ba BNCTL, liuhusi ‘fasilidade garantia kréditu suave’.
Liña kréditu ne’e ho objetivu atu estabelese garantia kréditu ida kona-ba kréditu ne’ebé sei fó hosi instituisaun bankária ba empreza mikro, ki’ik, média no boot, ho objetivu ba fixasaun ba taxa juru remuneratóriu ne’ebé permite hadi’a kondisaun asesu ba kréditu hosi parte empreza ne’ebé opera iha merkadu nasionál.
Liuhosi kréditu suave, benefiáriu bele halo kréditu iha banku hahú husi montante rihun $1 to’o 25, ho juru 3% kada tinan. Ba programa ne’e, dezde 2021 empreza 40 mak sai ona benefisiáriu ba kréditu suave.
Notísia relevante: BNCTL fó ona kréditu ba kliente 20.000 resin
Jornalista: Antónia Gusmão
Editora: Maria Auxiliadora
