DILI, 20 marsu 2023 (TATOLI)-Deputadu Parlamentu Nasionál (PN) hosi bankada FRETILIN, Fabião Oliveira, parabeniza empreza Aero Dili ne’ebé ohin , halo inaugurasaun ba aviaun Aero Dili ho marka A320 ho Bandeira RDTL, iha Aeroportu Internasionál Prezidente Nicolau Lobato.
“Hau hakarak fó parabens ba iha emprezáriu timoroan, Lourenço Oliveira, ne’ebé konsege duni lori aviaun Aero Dili mai Timor-Leste, no ohin inaugura ida ne’e hatudu katak ho indentidade Timor-Leste nian, bandeira Timor no pilotu timoroan sira no aero hosi timoroan sira,” Deputadu ne’e hato’o apresiasaun ne’e plenária PN, segunda ne’e.
Notísia Relevante :Aviaun Aero Dili sei realiza vou komersiál dahuluk iha 28 marsu
Ho investimentu ne’ebé maka Timoroan ne’e konsidera nu’udar orgulu bo’ot ida ba povu Timor-Leste no mós ba Governu.
“Setór privadu ne’ebé konsege kontribui ba dezenvolvimentu iha parte aeró ninian,” Nia apresia
Nune’e mós Deputada hosi bankada Frente Mudansa, Isabel Ximenes, hateten Timor-Leste sente orgulu ho prezensa vou aviaun Aero Dili iha nasaun ne’e.
“Voo Aero Dili ho ho pintura bandeira RDTL sei halo operasaun ba nasaun seluk ho espasu internasionál, tan ne’e hato’o parabens ba setór privadu, emprezáriu timoroan Lourenço de Oliveira, ba nia investimentu durante ne’e iha área aero,”Nia hateten
Notísia Relevante :PR Horta prefere vizita Estadu ba rai-li’ur uza aviaun Aero Dili
Jornalista: Nelson de Sousa
Editór: Agapito dos Santos
