DILI, 21 marsu 2023 (TATOLI)-Prezidente Repúblika, José Ramos Horta, tersa ne’e, simu ona karta kredensiál hosi Embaixadór foun Malázia iha Timor-Leste (TL), Amarjit Sinh, hodi troka Embaixadór sesante, Samirah Akbar.
“Ohin, depois tinan ida resin Embaixadór hosi Malázia sesante hotu, Prezidente Repúblika simu ona karta kredensiál hosi Embaixadór Malázia nian ba Timor-Leste,” Vise Ministru Negósiu Estranjeiru no Kooperasaun (MNEK), Julião da Silva, hateten ba jornalista sira iha Palásiu Prezidensiál, Bairru-Pité, Dili.
Notísia Relevante :PR Horta-PM Malázia diskute hametin relasaun bilaterál
Nia esplika, Timor-Leste no Malázia estabelese ona lasu kooperasaun bilaterál ida di’ak tebes molok TL restaura ninia independensia iha loron 20 fulan-maiu 2022, tanba militár hosi nasaun ne’ebá mós envolve iha misaun páz Organizasaun Nasaun Unida (ONU) iha Timor-Leste.
Durante serimonia entrega karta kredensiál ne’e, Xefe Estadu, José Ramos Horta husu ba Malázia atu kontinua fó apoiu ba dezenvolvimentu Timor-Leste iha área edukasaun hodi fó bolsa estudu ba timoroan.
Aleinde ne’e husu atu fó mós kapasitasaun ba jornalista timoroan, no fó apoiu ba setór privadu sira nune’e bele kontribui ba dezenvolvimentu ekonomia Timor-Leste nian.
“Prezidente Repúblika mós agradese ba apoiu hosi Governu Malázia durante Timor-Leste infrenta pandemia Covid-19,” Nia hateten.
Notísia Relevante :Malázia hakarak investe millaun $100 hodi loke fábrika mie instant iha TL
Jornalista: Nelson de Sousa
Editór: Agapito dos Santos
