Xefe suku Holsa ezije Governu reativa produsaun Border Pass
BOBONARO, 21 Marsu 2023 (TATOLI) – Xefe suku Holsa, postu administrativu Maliana, munisípiu Bobonaro, António Santa Cruz, husu ba governu liuhosi ministériu kompetente atu reativa atendimentu produsaun karta Border Pass hodi fasilita sidadaun sira iha liña fronteira.
Santa Cruz akresenta, boorder pass nu’udar meiu ida oinsá mak atu fasilita atividade movimentu ema no sasán ultrapasa uronteira rai-maran entre Timor-Leste no Indonézia.
Notísia relevante: UPF koordena ona ho TNI asegura liña fronteira iha eleisaun lejizlativa
“Ha’u hanesan lideransa komunitária husu ba governu atu re-ativa fali border pass, atu nune’e ita-nia sidadaun sira asesu bele trata dokumentu hirak-ne’e, atubele ba-mai iha fronteira ne’e ho dokumentu ne’ebé mak legál,” nia informa ba Jornalista sira, iha Maliana.
Tuir nia, razaun governu tenke reativa Border Pass hodi minimiza atividade ilegál iha liña fronteira no fasilita sidadaun sira halo atividade bazár iha fronteira kada semana.
“Ita atu hatete katak Border Pass ne’e loloos ne’e iha tiha ona, maibé la la’o ho razaun tanba saida ne’e la esplika, entaun ita la’ós prevene ilegál, maibé ita loke oportunidade ba ita-nia sidadaun sira prátika ilegál, tanba dokumentu ofisiál ne’ebé lansa tiha ona ba ita-nia komunidade Oe-Cuse, Suai no Bobonaro to’o agora paradu,” nia katak.
Xefe suku ne’e hatutan, governu presiza reativa fila-fali tanba foin lalais iha ne’e Ministériu Finana estabelese ona postu Álfanfega iha fronteira Mozon, aldeia Tunubibi, suku Tapo-Memo, postu administrativu Maliana.
Diretór Munisipál Konservatóriu Servisu Rejistu Notariadu, Munisípiu Bobonaro, Deolindo dos Santos, haktuir Governu Timor-Leste ho Indonézia iha akortu ida, fó kartaun Border Pass ba sidadaun rai rua ne’e hodi ultrapa fronteira ba-mai ho legál.
Nia dehan, dezde tinan 2016 ne’e kedas governu la fó sai kaderneta Border Pass tanba mákina avaria.
“Ha’u lori ona mákina ne’e ba ona sentrál atu halo manutensaun, maibé la hatene manutesaun ne’e oinsá ne’e kompetensia governu sentrál, maibé atu hatete de’it to’o ohin loron mákina ne’e seidauk hodi mai,” nia hateten.
Notísia relevante: Xefe suku Holsa ezije MJ rezolve problema kaderneta pasaporte
Jornalista : Sergio da Cruz
Editór : Evaristo Soares Martins
