DILI, 22 marsu 2023 (TATOLI) – Konsellu Ministru (KM) deside hodi estende tan, to’o 30 juñu tinan ne’e, distribuisaun sesta bázika ba família timoroan sira ne’ebé presiza liu, tanba antes ne’e define ona katak atividade ne’e to’o de’it iha 30 maiu.
Dekretu-lei ba estensaun sesta bázika nian ne’e aprezenta husi Ministru Koordenadór Asuntu Ekonómiku, Joaquim Amaral, ne’ebé estabelese husi Dekretu-Lei nu. 10/2022, loron 4 fulan-marsu, ne’ebé aprova ona medida sira ba reforsu distribuisaun sesta bázika ba família sira no apoiu ba operadór ekonómiku lokál sira no ne’ebé kria ona rejime espesiál aprovizionamentu ida ba efeitu, iha ámbitu planu rekuperasaun ekonómika nian.
“Governu estende tan to’o 30 juñu 2023, tanba iha abríl no maiu ne’e iha períodu kampaña no eleisaun, ne’ebé sei la ezekuta, nune’e ita trava lai”, Ministru Prezidénsia Konsellu Ministru, Fidélis Mangalhães, hatete hafoin reuniaun Konsellu Ministru, iha Palásiu Governu.
Governante ne’e hatutan, bainhira Eleisaun Parlamentár ida ne’e ramata, Governu kontinua fali programa refere.
“Hanoin programa ne’e la’o mak Governu foun ruma mai mós labele altera fali lei sira ne’e, tanba ne’e bazeia ba pontu prinsípiu ida katak buat ne’ebé ita halo ne’e la’os kria foun, maibé ida ne’e ba reklamante sira ne’ebé seidauk hetan sira-nia direitu”, Fidélis esplika.
Distribuisaun sesta bázika ne’ebé la’o daudaun iha territóriu atinje ona 90% kabe ba responsabilidade Ministériu Turizmu, Komérsiu no Indústria no ba Sekretaria Estadu Kooperativa (SEKoop) atinje 70%.
Notísia relevante: Governu estende distribuisaun sesta bázika to’o 30 maiu
Jornalista: Arminda Fonseca
Editora: Maria Auxiliadora
