DILI, 22 marsu 2023 (TATOLI) – Orsamentu ba Merenda Eskolár atu apoiu estudante 3.481 iha tinan 2023 ne’e prevee ona ho montante $19.632,50, Diretór Ensinu Báziku Sentrál Sergio Vieira de Melo (EBC-SVDM), Becora, Pedro de Carvalho relata.
“Foin lalais ami simu ona resibu totál orsamentu ba Merenda Eskolár iha tinan ida ne’e kuaze rihun $19-resin maibé orsamentu ne’e aloka hosi ministériu Administrasaun Estatál ba konta Autoridade Munisípiu Dili nian depois maka sira transfere ba konta Ekipa Jestaun Programa (EJP) sira nian,” Diretór Pedro de Carvalho informa ba Agência Tatoli ninia serbisu fatin EBC-SVDM Becora.
Nia dehan, eskola EBC-SVDM, tinan ne’e, implementasaun Programa Merenda Eskolár, sei apoia hosi grupu EJP hamutuk neen (6). Sira mak sei fornese ai-han ba estudante hamutuk 3.000-resin ba estudante sira iha eskola EBC ida ho ninia filiál lima. “Fiar katak bainhira Ekipa Jestaun Programa neen ne’e maka loke hotu ona konta bankária fiar katak segunda agora programa Merenda Eskolár ne’e bele realiza ona”.
Ezekutivu ne’e hatutan: “Totál estudante 3.481 ne’ebé ita informa ne’e kompostu hosi EBC SVDM inklui eskola filiál lima seluk mak hanesan EBF Taur Mata Ruak Altu Ospitál, EBF Mota Ulun, EBF Paiól, EBF Bobet Taibesi (Eskola Defisiénsia) no EBF Ai-turi laran. Ne’ebé, totál númeru ne’e la’ós EBC SVDM nian de’it”.
Programa Merenda Eskolár (ME) ne’e mós define ona ninia implementasaun hahú hosi segunda to’o sesta. Kada loron estudante ida sei han 35 sentavu no programa ne’e rasik sei kobre 135 loron efetivu. Enkuantu menu ba ME hetan mudansa ituan liu-liu iha ai-han ne’ebé la fó saúde di’ak ba labarik sira ninia vida. “Hapara susubeen, foremungu inklui masin-midar,” nia informa.
Entretantu, programa ME ba tinan ida ne’e sei implementa iha de’it fulan 10 nia laran hahú hosi marsu to’o dezembru. Enkuantu janeiru no fevereiru konsidera lakon. Tanba ne’e loron efetivu ba implementasaun programa ME ne’e mós redús hotu.
Notísia relevante:Servisu Edukasaun Dili hetan millaun $3,3 ba programa merenda eskolár
Jornalista : Tomé Amado
Editór : Rafael Ximenes de A. Belo
