DILI, 22 marsu 2023 (TATOLI) – Governu altera Dekretu-Lei rejime jurídiku komersializasaun ba substituisaun susu-been inan nian, ne’ebé aprezenta hosi Ministra Saúde, Odete Belo.
Ministru Prezidénsia Konsellu Ministru, Fidelis Mangalhães, relembra dekretu ne’e, delibera ona iha sorumutu Konsellu Ministru iha 25 janeiru 2023, maibé tanba introdusaun hosi alterasaun balu iha faze redasaun finál nian ne’ebé presiza submete fali ba projetu dekretu lei ne’e, ba deliberasaun foun nune’e ohin aprova fali.
“Lei ne’e aprova tiha ona antes haruka ba iha Prezidénsia Repúblika, maibé hosi ne’ebá iha rekomendasaun balu mai fali halo ajustamentu sira, liuliu kona-ba períodu tranzitóriu, tanba bainhira lei ne’e entre ein vigór presiza atu halo implementasaun fazeadamente ba dekretu lei ne’e”, Fidélis hatete iha Palásiu Governu.
Diploma ida-ne’e ho ninia objetivu atu regula komersializasaun, informasaun, publisidade no kontrolu ba kualidade produtu sira ne’ebé destina ona, direta ka indireta, ba alimentasaun laktente [bebé ne’ebé sei susu] no labarik sira to’o tinan tolu.
Diploma ne’e prosede ba regulasaun substánsia nutritiva no kritériu sira kompozisaun substituisaun susu-been inan nian, estabelese regra sira ba ninia publisidade, define regra sira kona-ba informasaun, rotulajen no embalajen, no hatudu entidade kompetente hirak mak autoriza ba komersializasaun.
Konsidera katak susu-been inan nian, mak ai-han ideál, ne’ebé importante tebes, ba labarik sira-nian kreximentu no dezenvolvimentu saúde, bainhira inan sira la fó susu-been ba labarik, ka halo parsialmente, asegura, kualidade substitutu ba ida-ne’e, maibé mós la interferénsia ninia promosaun no distribuisaun ho protesaun ba ai-han inan nian, tuir rekomendasaun husi Kódigu Internasionál ‘Marketing’ atu Substitui Susu-been Inan nian no rezolusaun subsekuente sira husi Asembleia Saúde Mundiál.
Projetu dekretu-lei ne’e prevee kontra-ordenasaun entre rihun $1 no rihun $4, posibilidade iha sansaun sira hanesan lakon objetu pertense sira ba ajente no suspensaun komersializasaun ba produtu.
Notisia relevante : https://tatoli.tl/2023/01/25/km-aprova-rejime-juridiku-substitutu-susu-been-inan/
Jornalista: Arminda Fonseca
Editora: Maria Auxiliadora
