DILI, 22 marsu 2023 (TATOLI) – Governu aprova Dekretu-Lei kona-ba Kondusaun Atividade Desmantelamentu iha Kampu Bayu-Undan nian, ne’ebé aprezenta hosi Ministru Petróleu no Minerál, Víctor da Conceição Soares.
Ministru Prezidénsia Konsellu Ministru, Fidélis Mangalhães, hatete produsaun husi kontratu rua partilla produsaun ne’ebé asina entre membru sira ‘joint-venture’ Bayu-Undan no Autoridade Nasionál Petróleu no Minerais (ANPM) ne’e remata, nune’e presiza halo desmantelamentu ba plataforma, estrutura, gazodutu, ka oleodutu hotu, no estrutura no ekipamentu sira ne’ebé asosia, iha termu ne’ebé prevee iha kontratu.
“Dekretu-lei ida ne’e importante tebes tanba nia sei regula implementasaun bainhira ita desmantela Bayu-Undan, tanba bainhira Bayu-Udan para ona produsaun, nia ekipamentu sira ne’ebé durante ne’e hodi fura mina no tanke sira ne’ebé tau mina iha plataforma ne’e sei desmantela no halo tratamentu. Karik dada mai ita-nia nasaun sei lori bá Portu Tíbar”, hatete Fidélis Magalhães, iha Palásiu Governu.
Nia esplika tratamentu ne’ebé sei halo ba ekipamentu sira ne’e mak hanesan hasai rezidu kímiku sira ne’ebé mak ladi’ak ba ambiente. “Bainhira hasai tiha kímiku, ekipamentu ida ne’ebé mak bele prosesa halo esportasaun filafali no ida ne’ebé Timor-Leste bele uza, rai hodi utiliza”.
“Tuir dekretu-lei ne’e mós tau rekizitu sira kona-ba meiu ambiente nian. Bainhira ita dada ka taka ona operasaun mina nian ne’e tenke taka fali mina-matan, nune’e labele fó fali poluisaun ba ita-nia tasi”, afirma.
Dekretu-lei ne’e ninia objetivu mak estabelese rejime jurídiku ida ba ezersísiu atividade desmantelamentu iha área kontratu no iha territóriu terrestre Timor-Leste nian, hodi garante simultáneamente protesaun saúde, seguransa no ambiente Timor-Leste no povu.
Jornalista: Arminda Fonseca
Editora: Maria Auxiliadora
