DILI, 22 marsu 2023 (TATOLI) – Konsellu Ministru autoriza realizasaun despeza ho valór millaun $15 kona-ba atribuisaun ba subvensaun anuál ida ba Konferénsia Episkopál Timorense (CET, sigla portugés).
Subvensaun anuál ida-ne’e ba CET sei realiza tuir akordu ne’ebé asina ona iha 14 agostu 2015, entre Timor-Leste no Santa Sé no Akordu-Kuadru ne’ebé asina iha 16 juñu 2017 entre Governu no CET, ne’ebé prevee kontribuisaun anuál ida, tuir disponibilidade finanseira Ezekutivu nian.
Ministru Prezidénsia Konsellu Ministru, Fidélis Magalhães, hatete akordu ida ne’e prevee ba atividade sira ho karater sosiál, edukativu no governu ekleziál Igreja Katólika nian.
Selebrasaun ba asinatura akordu ne’e sei realiza iha kinta (23/03), iha Ministériu Finansa, Aitarak-laran, entre Ministru Finansa, Rui Gomes, no Dom Virgílio Kardeál do Carmo da Silva, SDB.
Lembra katak Governu no CET, asina iha maiu 2022, akordu subvensaun anuál ho montante millaun $15 no asina Akordu-Kuadru ba períodu entre 2022 no 2027.
Akordu-Kuadru hanesan akordu Governu Timor-Leste ho Santa Sé, ne’ebé kada tinan lima sempre renova, nune’e liuhosi akordu ne’e kada tinan Governu apoiu subvensaun tuir kbiit.
Hosi orsamentu millaun $15 ne’ebé diponibiliza, iha tinan kotuk, ba CET utiliza tuir akordu ne’ebé iha katak aloka ba edukasaun 50%, sosiál 25%, servisu igreja 15%.
Notísia relevante: Governu asina akordu kuadru no subvensaun milliaun $15 ho CET
Jornalista: Antónia Gusmão
Editora: Maria Auxiliadora
