DILI, 23 marsu 2023 (TATOLI) -Uniaun Europeia (EU), kinta ne’e, fó apoiu orsamentu millaun hamutuk millaun $1,210,775 ba Ajénsia Childfund Timor-Leste hodi implementa projetu haforsa koezaun sosiál iha munisípiu Liquiça.
“UE apoiu orsamentu ba projeitu ne’e ho objetivu atu asegura joventude sira iha munisípiu Liquiça no bele envolve ho konstrutivu iha sira-nia kultura no sosiedade. Tanba ne’e sira bele kompriende oinsá kontribui ba prevensaun konflitu iha nível sosiedade,” Embaixadora UE ba Timor-Leste, Marc Friedrich hateten ba jornalista sira iha sala reuniaun IADE, Liquiça, kinta ne’e.
Diplomata ne’e dehan Uniaun Europeia apresia bainhira servisu hamutuk ho Childfund no Organizasaun Naun Govermentál (ONG) lokál sira hodi promove páz no hametin koezaun sosiál ba juventude iha munisípiu sira.
Tuir nia projetu ida-ne’e bele ajuda joven sira atu uza kultura hodi prevene konflitu no mós tulun joven sira atu hari’i dame iha sosiedade nia le’et.
“Mudansa joventude sira-ne’e presiza aprende oinsá atu uza métodu kreativu hanesan jornalizmu, teatru no sívika, espresa sira-nia lian ho konstrutivu, no esplora oinsá sira bele envolve ho konstrutivu ho lider lokál no tradisionál sira,” nia hateten.
Diretór Nasionál Chilfund iha Timor-Leste, Erine Digkstra, hateten projetu ne’e ho apoiu husi Uniaun Europeia, iha koordenasaun servisu ho ONG lokál sira.
“Projetu ida-ne’e sei ajuda hasa’e foin-sa’e sira-nia solusaun ba konflitu ne’ebé abranjente, liuhusi dalan kulturál. Ami sei servisu hamutuk ho joven sira ne’ebé foka ba labarik eskola, mestre, ofisiál governu lokál sira husi suku ba munisípiu, lider tradisionál, no lider relijiozu sira,” nia dehan.
Diretór Ezekutivu Belun, Luis Ximenes, hateten, Belun maka sei fó apoiu ba Childfund Timor-Leste hodi implementa projeit ne’e hodi prevene konflitu nune’e sei kontinua hametin páz no estabilidade.
“Ami servisu besik liu ho lider komunitáriu no lider tradisionál sira atu ko’alia kona-ba páz no asegura moris ne’ebé di’ak ba komunidade tomak,” nia esplika.
Projetu haforsa koezaun sosiál iha munisípiu Liquiça ne’e tuir alvu sei implementa iha postu Administrativu Liquiça no Bazartete.
Jornalista: Osória Marques
Editor : Agapito dos Santos
