COVALIMA, 25 marsu 2023 (TATOLI) – Prezidente Autoridade Nasionál Petróleu no Minerál (ANPM), Florentino Soares Ferreira, husu ba jornalista-sira atu kontrola ho kritíku, progresu dezenvolvolmentu setór petróleu no minerál ho transparánsia.
“Setór petróleu, mineral, setór krítiku ba dezenvolvimentu ita-nia rai. Dalabarak ami sente susar tebes atu transmite progresu dezenvolmentu no situasaun ikus husi setór ida-ne’e ba povu. Ami fiar ita-bo’ot sira mak sai matan, tilun, ibun husi povu bele ajuda ami atu hala’o ami-nia servisu di’ak-liu, hakarak hatudu ba ita-nia sosiedade setór ida-ne’e ho transparansia”, Florentino Manuél Soares Ferreira, hato’o liuhusi nia diskursu bainhira ensera semináriu ba jornalista-sira, iha salaun enkontru Aeroportu Comandante em Chefe Kay Rala Xanana Gusmão, sesta ne’e.
Tanba setór petróleu no minerál setór ne’ebé kritíku no estratéjiku nune’e tenke fahe informasaun kona-ba setór petróleu ba povu. Povu iha direitu atu hatene informasaun ho loos kona-ba progresu dezenvolvimentu.
“Ha’u husu ita-bo’ot sira (jornalista) atu kritíka ami liutan ho krítika konstrutiva. Ho krítika konstrutiva no ita-bo’ot sira bele buka informasaun ativu liutan nune’e ita hotu bele moris iha situasaun ne’ebé transparente “, nia dehan.
Reprezentante diretór ezekutivu Konsellu Imprensa, António Dias, apresia programa husi Autotidade nasionál petróleu no minerál (ANPM) ne’ebé durante ne’e kapasita jornalista no editór hodi hasa’e sira-nia kuñesementu konaba área petróleu no minerál.
“KI apresia inisiativa husi ANPM hodi eleva kuñesementu, kapasidade téknika professional, intelektuál, ba ita-nia jornalista sira programa formasaun aliña iha programa konselu Imprensa
Ho nune’e Konsellu Imprense hato’o agradese ba Autoridade Nasionál no Petróleo (ANPM), realiza semináriu ba jornalista no editór sira ne’e, estratéjiku loos ne’ebé iha momentu besik atu hala’o kampaña eleitorál sei foka kona-ba tópiku ida-ne’e”.
Timor-Leste restaura nia independénsia durante tinan 23 ne’ebé durante ne’e Estadu dependénsia ba fundu petróleu hodi finansia mákina Estadu.
“Semináriu durante loron tolu ita-boot sira bele iha ona kuñesementu jerál no sai ona manuál ba ita-bo’ot sira kona-ba fundu petróleu no minerál tuir padraun” , nia hateten.
ANPM realiza semináriu ne’e durante loron tolu ne’ebé hahú iha loron 22 to’o loron 24 hodi fahe informasaun ba jornalista no editor sira konaba servisu ANPM.
Iha semináriu ba loron dahuluk no daruak funsionáriu ANPM apresenta matéria konaba sira-nia servisu iha ANPM no ba loron da toluk lori jornalista-sira ba vizita perfurasaun mina posu Liurai ,Lafaek , Fatin dulas fatuk no Postu Abastesementu Kombustivél (PAK) Timor-Gap no Globál , iha Covalima .
Hafoin semináriu, ANPM mós atribui sertikadu ba jornalista na’in 18 husi media sira hanesan, Rádiu no Televizaun Timor-Leste (RTTL.EP) Agência Tatoli, Hatutan, Timor-Post, Neon Metin, Independe, STL, Televizaun Edukasaun (TVE) no Rádiu no Televizaun Maubere (RTM).
Jornalista : Celestina Teles
Editór : Rafael Ximenes de A. Belo