Prezidente Repúblika fó hanoin ba polítiku sira ‘ataka pesoál ne’e ladi’ak’
OÉ-CUSSE 27 marsu 2023 (TATOLI) – Prezidente Repúblika (PR), José Manuel Ramos Horta, fó hanoin ba dirijente partidu polítiku sira atu hato’o programa ba povu la’ós halo ataka pesoál hahú hosi konsolidasaun ne’ebé oras ne’e la’o iha territóriu nasionál.
“Ha’u husu mós ba líder sira, favór ita haree took, lalika ko’alia barak iha kotuk, lalika ataka pesoál, ne’e ladi’ak,” Prezidente Repúblika, José Manuel Ramos Horta, ko’alia iha otél Ambeno, Oé-Cusse, sábadu ne’e.
Xefe Estadu mós husu deputada sira iha Parlamentu Nasionál, buka malu ko’alia didi’ak, besik eleisaun ona lalika loke tán konfrontasaun problema oinoin.
Razaun Xefe estadu husu atu festa demokrasia ne’e la’o ho pás no dame nune’e dezenvolvimentu nasaun nian bele la’o ho avansu.
“Di’ak liután buka serbisu hamutuk, ha’u-nia apelu maka ida-ne’e,” Xefe Estadu fó hanoin ba partidu polítiku sira.
“Rezultadu mai ita hotu-hotu simu, hanesan tinan 20 nia laran, ita sempre simu, balun iha oin no balun iha kotuk, maibé hotu-hotu manán, kuandu eleisaun la’o di’ak ho onestidade no dame,” nia katak.
Eis Ministru Negósiu Estranjeiru no Kooperasaun ne’e, apela ba partidu konkorente sira atu simu rezultadu ho fuan boot, tanba povu maka sei hili no deside liuhosi votu sekretu iha loron eleisaun.
Prezidente Repúblika, José Manuel Ramos Horta, dekreta ona loron eleisaun parlamentár ba períodu 2023-2027 ne’e sei akontese iha 21 maiu tinan ne’e, no kalendáriu ba kampaña eleitorál sei hahú iha loron 19 abríl termina iha loron 19 maiu 2023.
Nune’e mós dadús provizóriu hosi Tribunál Rekursu, daudaun ne’e rejista ona partidu polítiku atu konkore iha eleisaun parlamentár períodu 2023-2027 hamutuk partidu 17.
Notísia relevante: Alkatiri iha esperansa kaer-liman ho Xanana Gusmão
Jornalista : Abílio Elo Nini
Editór : Evaristo Soares Martins
