DILI, 28 marsu 2023 (TATOLI) –Antes ne’e kada fulan asosiasaun sira simu subsídiu hamutuk $1000 maibé desizaun hosi ezekutivu FFTL aumenta ba $1500 kada fulan hodi finansia ba administrasaun no dezenvolve jogadór juvenil sira, Prezidente Federasaun Futeból Timor-Leste (FFTL) Francisco Jerónimo informa.
“Agora subsídiu kada fulan ba asosiasaun sira ne’e sa’e ona ba $1500, antes ne’e $1000 kada fulan. Osan ne’e atu funsiona servisu asosiasaun nian no oinsá sira jere hodi dezenvolve jogadór juvenil sira,” Prezidente FFTL, Francisco Jerónimo hateten ba Agência TATOLI, foin lalais ne’e.
Daudaun ne’e FFTL halo hela observasaun ba ezekusaun orsamentu ne’ebé antes ne’e fó ba asosiasaun sira, bainhira kumpri hotu rekezitu no relatóriu submete kada fulan la falla ho loloos mak FFTL sei deside halo transferénsia osan ne’e tinan ida dala rua kada fulan neen.
Nia esplika, orsamentu ne’ebé atribui ba asosiasaun sira ne’e ho objetivu loloos tuir planu estratéjiku mak asosiasaun sira tenke iha obrigasaun kria formasaun ba jogadór juvenil sira depois mak halo jogu depende ba jestaun asosiasaun sira nian ba orsamentu ne’ebé oferese hosi FFTL.
Asosiasaun hirak ne’ebé sei utiliza ba orsamentu ne’e mak hanesan, asosiasaun Dili Leste, Dili Oeste, Manatuto, Liquiça, Ermera, Covalima, Lautem, Baucau, Viqueque, Bobonaro, Ainaro, Aileu, Manufahi, Rejiaun Administrativa Oe-Cusse Ambeno (RAEOA) no asosiasaun futeból femenina.
Jornalista : Hortencio Sanchez
Editór : Rafael Ximenes de A. Belo
