DILI, 28 marsu 2023 (TATOLI)—Ministériu Administrasaun Estatál (MAE), tersa ne’e, hasoru malu ho Primeiru Ministru (PM) Taur Matan Ruak hodi atualiza servisu preparasaun MAE nian ba iha Eleisaun Parlamentár (ElPar) ne’ebé sei realiza iha loron 21 maiu tinan ne’e.
“Ohin ha’u hato’o preprasaun prinsipál sira relasiona ho realizasaun eleisaun nian ba Primeiru Ministru mak kona-ba resensiamentu iha rai-liur, no railaran. Ne’ebe ba ba rai-liur nian hanesan resensiamentu eleitorál no atualizasaun baze dadus ne’ebé hahú ona iha loron 01 marsu to’o 30 marsu,” Miguel Pereira de Carvalho, dehan ba jornalista sira hafoin hasoru malu ho PM Taur iha Palásiu Governu, Dili, tersa ne’e.
Aleinde ne’e, MAE mós atualiza ba Primeiru Ministru kona-ba preparativu lojístiku sira hotu ba realizasaun eleisaun nian, ne’ebé Sekretariadu Tékniku Administrasaun Eleitorál (STAE) hanesan orgaun ida iha ona kondisaun hotu atu realiza eleisaun jeral tinan ne’e.
Notisia relevante : 01 marsu hahú halo resensiamentu eleitorál iha diaspora
Nia dehan, ekipamentu sira kona-ba oinsa fasilita eleisaun nian barak mak to’o ona, falta de’it tinta ne’ebe iha tempu badak sei halo teste ho partidu polítiku sira. Hein katak fulan abril nia rohan ka, inísiu maiu tinta sira ne’e bele to’o ona hodi haruka ba sentru votasaun sira.
Enkuantu tinta ne’ebé STAE sosa ho totál orsamentu hamutuk $350.000, ne’e, no sei sosa liu hosi UNDP (Programa Nasaun Unida ba Dezenvolvimentu).
“Ita mós informa ba Primeiru Ministru kona-ba meiu atu hasa’e taxa partisipasaun populasaun nian ba iha eleisaun mak aumenta sentru votasaun sira nomós estasaun votu iha territóriu laran tomak no uza mós 25% hosi totál sentru votasaun no estasaun votu ne’ebé mak ita utiliza iha eleisaun Prezidensiál tinan 2022 ne’e,” nia dehan.
Notisia relevante : Tinta butir entre 10.500-12.500 sei to’o TL iha abríl
Jornalista : Arminda Fonseca
Editora : Armandina Moniz
