DILI, 28 marsu 2023 (TATOLI) – Organizasaun Internasionál ba Migrasaun (OIM) no Sekretaria Estadu Protesaun Sivíl (SEPS) apoia Autoridade Protesaun Sivíl (APC, sigla portugés) hodi dezenvolve matadalan ne’ebé foka liu ba jestaun risku ba dezastre naturál iha Timor-Leste (TL).
Ba elaborasaun matadalan ne’e, SEPS no OIM organiza semináriu nasionál ida, tanba konsidera ne’e importante ba APC atubele halo jestaun ida di’ak bainhira akontese dezastre naturál.
“APC sempre prontu atu ajuda komunidade bainhira presiza no prontu ona to’o nivel munisípiu. Espera katak ema hotu bele serbisu hamutuk no ajuda komunidade sira atu hatán ba dezastre”, Sekretáriu Estadu Protesaun Sivíl, Joaquim dos Reis Martins, dehan iha City 8, Manleuana.
Nia salienta katak OIM iha Timor-Leste implementa tiha ona projetu multianuál balun ho objetivu atu haforsa kapasidade institusionál iha nivel oin-oin kona-ba prevensaun dezastre, preparasaun, responde no rekuperasaun, no mós hasa’e reziliénsia iha komunidade sira ne’ebé maioria hasoru dezastre atu redús risku.
“Timor-Leste nia zona norte vulneravel tebes ba perigu naturál sira. Timor-Leste mós hetan impaktu husi El Niño relasiona ho klima anómala ne’ebé liga ho bailoron-naruk. Sei sai boot liután iha futuru ho ataka pestisida no inundasaun regulár, rai-halai, mota muda, erozaun tanba udan-boot no desflorestasaun iha fatin hotu-hotu halo Timor-Leste sai vulneravel liu ba inseguransa ai-han no ki’ak”, realsa.
Iha sorin seluk, Xefe Misaun OIM iha Timor-Leste, Ihma Shareef, hatete prontu hamutuk ho Governu, liuliu ho APC hodi fo apoiu ba atividade protesaun sivíl nian ba responde ba dezastre ne’ebé sei akontese iha país.
Notísia relevante: OIM entrega sasán non-food item ba SEPS responde situasaun emerjénsia
Jornalista: Osória Marques
Editora: Maria Auxiliadora
