DILI, 14 Marsu 2023 (TATOLI)–Governu Japaun no International Organization for Migration (IOM), apoiu sasán la’ós hahan ka non-food item (NFI) no entrega ba Governu Timor-Leste liuhosi Sekretaria Estadu Protesaun Sivíl (SEPS) atu responde ba situasaun emerjénsia sira iha Timor-Leste.
Xefe misaun IOM iha Timor-Leste, Aishath Imah Shareef, hateten apoiu ida-ne’e hodi halo redusaun risku dezastre no hadi’a preparasaun emerjénsia iha Timor-Leste ho orsamentu estimadu $500,000, ho objetivu atu harii sistema ida hodi prepara ba futuru dezastre naturál sira liu-husi apoiu ba Governu no povu Timor-Leste atu aumenta vulnerabilidade hosi preparasaun dezastre nian ne’ebé hatudu liuhusi inundasaun.
Sasán non-food item (NFI) ka sasán la’ós hahan hamutuk 900 inklui ho armajen movél ida, no mós sasán dapur nian ne’ebé sei benefisia ema 4,500 no xefe família 900, hodi hadi’a kondisaun moris populasaun vulneravél sira-nian durante dezlokasaun obrigatóriu.
“Fornese ba Governu ho sasán la’ós hahan sira importante tebes ba nasaun atu bele responde di’ak liután no prepara-an ba dezastre iha futuru. Importante liu mak, ida-ne’e kontribui mós ba hamenus risku hosi COVID-19 no ba iha sentru evakuasaun sira,” Xefe misaun IOM iha Timor-Leste ne’e hateten iha nia intervensaun iha serimónia entrega sasán iha Kampung Baru, tersa ne’e.
Embaixadór Japaun iha Timor-Leste, Tetsuya Kimura, hateten Japaun mós nasaun ida-ne’ebé hasoru dezastre iha tempu uluk, nune’e bele fahe matenek ne’ebé Japaun hetan ona iha pasadu.
“Japaun servisu hamutuk ho Governu Timor-Leste liuhosi projetu oioin ba kada siklu redusaun risku dezastre. Ami sente importante atu bele responde ba problema ne’ebé relasiona ho redusaun risku dezastre iha maneira ne’ebé kompriensivu,” nia dehan.
Sekretáriu Estadu Protesaun Sivíl, Joaquim Gusmão, agradese ba IOM no Governu Japaun tanba fornese produtu sasán la’ós hahan no armajen movél sira.
“Ida-ne’e nesesáriu tebes tanba to’o agora ami foka de’it ba dezastre ida, maibé agora ami tenke foka liu ba mitigasaun no prevensaun. Estudu barak dehan katak mitigasaun no prevensaun di’ak bele salva ema barak no hamenus kustu,” nia dehan.
Jornalista : Osória Marques
Editór : Cancio Ximenes
