OÉ-CUSSE 28 marsu 2023 (TATOLI) – Sekretariadu Tékniku Administrasaun Eleitorál (STAE), daudaun ne’e identifika ona sentru votasaun sira iha Rejiaun Administrativa Espesiál Oé-Cusse Ambeno (RAEOA), balun seidauk iha fasilidade adekuada hanesan bee-moos, eletrisidade no liña telekomunikasaun.
Diretora STAE Oé-Cusse, Luíza da Costa, informa, menus fasilidade sira-ne’e akontese iha sub-rejiaun haat iha suku balu mós kondisaun estrada aat, tanba daudaun ne’e tempu udan.
“Ita-nia ekipa brigadista sira agora remata ona identifikasaun, sira sai iha loron 14 marsu, entaun segunda ne’e, ita simu ona relatóriu, iha sentru votasaun balu seidauk iha fasilidade adekuadu hanesan eletrisidade, bee-moos, no fatin balu hanesan Citrana, sub-rejiaun Nítibe no Pássabe laiha liña telekomunikasuan,” Luíza da Costa, ko’alia iha Oé-Cusse, tersa ne’e.
Tuir nia, iha eleisaun liubá, sentru votasaun sira maioria uza fatin públiku sira de’it to’o eleisaun tinan ne’e, hanesan eskola, sede suku no sede aldeia, ba mobiliáriu meza no kadeira sufisiente, maibé liña elétrika presiza apoia atu dada hosi komunidade tama fatin sentru votasaun.
Nune’e, iha tempu badak sei submete proposta ba Autoridade RAEOA hodi husu apoia, liuliu Departamentu Eletrisidade Timor-Leste (EDTL), Diresaun Rejionál Infraestrutura.
“Agora tékniku sira sei rejista totál sentru votasaun hira mak presiza apoiu atu dada ahi no tau bee-moos, ita lista kompletu tiha kada fatin, depois mak ita hato’o ba Autoridade hodi husu atu hadi’a, antes loron eleisaun ne’e akontese, tanba eleisaun liubá ita sempre hetan apoiu hosi Autoridade RAEOA atu tau matan ba sentru votasaun sira,” nia katak.
Entretantu, dadús hosi STAE Oé-Cusse, daudaun ne’e rejista eleitór provizória bazea dadus 2022 hamutuk 53.153, komposta hosi mane 27.407 no feto 26.106, tanba dadus 2023 seidauk sinkroniza ho totál sentru votasaun 80 no estasaun votasaun 115 maka estabelese iha territóriu Oé-Cusse.
Prezidente Repúblika José Manuel Ramos Horta, dekreta ona loron eleisaun parlamentár ne’e sei akontese iha 21 maiu tinan ne’e, no kampaña eleitorál sei hahú iha loron 19 abríl to’o 19 maiu 2023.
Notisia relevante: STAE Oé-Cusse sei rektruta ofisiál eleitorál 1.150
Jornalista : Abílio Elo Nini
Editór : Evaristo Soares Martins
