DILI, 29 marsu 2023 (TATOLI)—Diretór Sektretariadu Tékniku Administrasaun Eleitorál (STAE), Acilino Manuel Branco, hateten komunidade Ataúro maiória hetan difikuldade asesu ba dokumentu ne’ebé emite hosi Dirasaun Nasionál Notariadu.
Notísia Relevante: Governu presiza pronúnsia transferénsia kartaun eleitorál hosi postu ba munisípiu Ataúro
“Preokupasaun kona-ba eleitór iha munisípiu Ataóru ne’ebé atualiza sira-nia eleitór iha ne’ebá ne’e, ita-nia STAE hateten mai ami, sira mós iha difikuldade asesu ba dokumentu ne’ebé mak emite hosi Diresaun Nasionál Notariadu nian. Tanba, tuir lei eleitorál katak bainhira halo resensiementu no atualiza tenke iha dokumentu komprovativa tolu hanesan kartaun eleitorál, billete identidade no sertidaun RDTL mak foin halo,” Acilino Manuel Branco hateten ba Agência Tatoli, iha Tribunál Rekursu, Caicoli, kuarta ne’e.
Durante ne’e, STAE nia prezensa iha Ataúro liu-liu iha halo atendimentu ba komunidade iha suku no to’o aldeia, maibé kestaun mak dokumentu entaun labele atualiza sira-nia kartaun.
“Ita-nia tékniku nia prezensa iha komunidade ne’e iha hela maibé komunidade maiória mak laiha dokumentu hodi tuir resensiamentu no atualiza kartaun. Entaun ida-ne’e mak ita-nia preokupasaun,” nia dehan.
Nia dehan, Ataúro transforma ona ba munisípiu, se aban bainrua mak mai ho unidade jeográfiku hanesan postu administrativu entaun presiza sei haree took oinsá baze dadus integra hela munisípiu Dili, bainhira sira seidauk halo atualizasaun.
“Maibé tempu mak loron ohin no aban de’it ona. Entaun agora sidadaun sira-ne’ebé nia jeográfika uluk postu Ataúro, maibé ita haree parte seluk sira tama ona iha ne’ebá. Espera katak dirasaun notariadu Ataúro bele fasilita ona sira tanba ami STAE labele halo buat ida,” nia dehan.
Atu rezolve problema kona-ba komunidade iha Ataúro ne’ebé mak seidauk atualiza kartaun eleitorál, nia esplika, presiza estabelesimentu sentru votasaun paralelu.
“Sidadaun ne’ebé seidauk atualiza ne’e mak preokupasaun boot, entaun atu ita rezolve mak alterasaun lei eleitorál la promulga hodi estabelese sentru paralelu,” nia dehan.
Tuir informasaun ne’ebé STAE atualiza, katak dadus Ataúro nian foin mak 3.000-resin tanba komundade barak mak seidauk atualiza sira-nia kartaun eleitorál.
Notísia Relevante: STAE sei atualiza kartaun eleitorál tuan iha Ataúro
Jornalista : Osória Marques
Edotór : Cancio Ximenes
