DILI, 30 marsu 2023 (TATOLI) – Prezidente Repúblika (PR), José Ramos Horta, iha esperansa katak Governu Timor-Leste (TL) no Repúblika Indonézia (RI) sei realiza ideia Prezidente indonéziu, Joko Widodo, nian atu halo konetividade marítima ho ró-ferry entre Kupang-Dili no Darwin (Austrália).
“Ha’u espera bá oin realiza tan ideia ida hosi Prezidente Repúblika Indonézia atu halo [konetividade marítima ho] ró-ferry ho rota entre Kupang, Dili no Darwin no ha’u apoiu 100%. Dalaruma bele halo entre Dili, Alor no Oé-Cusse, tanba ha’u haree Alor hosi aviaun de’it bonitu tebtebes no ha’u sente atu bá vizita illa ne’e”, Horta hatete iha lansamentu ba operasaun autokarru Babadok Express ho rota Dili-Kupang, iha Sentru Konvensaun Dili (CCD), kinta ne’e.
Iha jullu 2022, Prezidente Repúblika Indonézia husu Timor-Leste atu hasa’e ligasaun marítima liuhosi destinasaun Kupang-Dili-Darwin.
Tuir notísia ANTARA nian ne’ebé Tatoli sita katak Prezidente Jokowi aprezenta asuntu ne’e iha ámbitu vizita Xefe EstaduTimor-Leste, José Ramos Horta, ho nia delegasaun, iha Palásiu Prezidensiál Bogor-Indonézia.
“Ba konektividade maritima, ha’u sente importante tebes loke rota Kupang-Dili-Darwin,” dehan Prezidente Jokowi.
Jokowi esplika katak nasaun rua konkorda hodi hasa’e konektividade terrestre nomós maritima.
Nia husu mós ba BUMN (Badan Usaha Milik Negara) no empreza sira iha Indonézia hodi partisipa iha dezenvolvimentu Timor-Leste, inklui iha setór infraestutura.
Refere ba ideia Xefe Estadu indonéziu nian ba konetividade terrestre entre nasaun rua ne’e, Prezidente Ramos Horta lansa ona, iha 30 marsu, operasaun autokarru Babadok Express ho rota Dili-Kupang. Hosi parte Indonézia nian iha ona operasaun DAMRI ho rota Kupang-Dili.
Notísia relevante: Prezidente Repúblika lansa operasaun Babadok Express entre Dili no Kupang
Jornalista: Antónia Gusmão
Editora: Maria Auxiliadora
