iklan

NASIONÁL, EKONOMIA, HEADLINE

Prezidente Repúblika lansa operasaun Babadok Express entre Dili no Kupang

Prezidente Repúblika lansa operasaun Babadok Express entre Dili no Kupang

Prezidente Repúblika lansa operasaun dahuluk Babadok Express entre Dili no Kupang.

DILI, 30 marsu 2023 (TATOLI) – Prezidente Repúblika (PR), José Ramos Horta, lansa ofisialmente operasaun autokarru ho marka Babadok Express ho rota entre Dili no Kupang-Indonézia.

Ramos Horta hato’o parabéns ba Asosiasaun Emprezariál Feto Timor-Leste (AEMTL, sigla portugés), tanba iha inisiativa ne’ebé di’ak hodi inevste iha ligasaun transporte terrestre nian.

Prezidente Repúblika, José Ramos Horta. Imajen Tatoli/Egas Cristovão.

“Ha’u hakarak marka prezensa iha atividade sira ne’e tanba ha’u sempre apoia konetividade Timor-Leste ho Repúblika Indonézia, ka Timor-Leste-NTT. Iha ha’u-nia prezidénsia, ha’u hahú kedas unidade ida ‘women empowerment economy’, tanba feto ne’e serbisu badinas liu mane, tanba feto rihun ba rihun halo jestaun ba osan, bele uitoan más konsege halo buat hothotu para fó han ema sira iha uma-laran”, Horta hatete molok tesi fita simbólu ba lansamentu opersaun Babadok Express, iha Sentru Konvensaun Dili (CCD), kinta ne’e.

Prezidente Repúblika iha lansamentu ba operasaun Babadok Express entre Dili no Kupang. Imajen Tatoli/Egas Cristovão.

Xefe Estadu haree katak feto Timór mós iha jeitu ba negósiu no presiza apoia tan, liuliu iha ekipamentu hodi sira bele hala’o atividade negósiu ne’e ho di’ak. “Inisiativa sira ne’e importante bainhira ita aumenta ita-nia integrasaun ekonómika, integrasaun rejionál. Ita besik atu tama ona ASEAN”, katak nia.

Laureadu Nobel Pás ne’e fó hanoin mós atu hadi’ak movimentu operasaun karreta entre Dili no Kupang tanba asidente tráfegu barak demais, hanesan asidente ho karreta angguna, mikrolete, tanba dala-ruma rezulta ema sanulu-resin mak kanek no mate.

Horta iha esperansa ba Governu foun mai halo programa ida di’ak hodi apoia setór privadu.

Prezidente AEMTL, Hergui Luina Alves, hatete hafoin lansamentu autokarru refere, hahú kedas operasaun Dili bá Kupang, nune’e mós DAMRI hosi Kupang mai Dili iha loron hanesan. Iha loron tuirmai karreta sira ne’e sei troka malu katak Babadok filafali mai Dili no DAMRI fila hikas ba Kupang. Operasaun dahuluk hahú tula pasajeiru na’in-15.

Prezidente AEMTL, Hergui Luina Alves. Imajen Tatoli/Egas Cristovão.

Ligadu ho presu, nia hateten tanba iha hela tempu promosaun husi loron 30 to’o 02 abril 2023 maka presu billete bá-mai $50, enkuantu presu normál mak $40.

“Ho konetividade terrestre ne’e fó benefísiu ekonómiku liuhosi hakbiit emprezária feto sira. Tanba ne’e oportunidade negósiu ida di’ak tebtebes bele mós loke dalan asesu ba merkadu liuhosi konetividade hodi kontribui taxa ba kofre Estadu”, nia otimista.

Autokarru ne’e kompleta ho ekipamentu hanesan hariis-fatin, televizaun, free WiFi, karrega telemovel, foot rest, AC, bagazen no seluk hanesan kadeira fleksivel. Karreta ne’e bele akumula kadeira ka pasajeiru 33.

Notísia relevante: 30 marsu lansamentu bus DAMRI, Governu deside billete másimu $45

Ligadu ho infraestrutura bázika, liuliu kondisaun estrada, emprezária nasionál ne’e dehan kondisaun estrada sai dezafiu ida, maibé karreta ne’e iha tiha kedas ona ninia espesifikasaun sira sukat ona ho kondisaun estrada sira ne’ebé iha no bainhira tama iha estrada ku’ak nia iha tiha ona estabilazadór rasik.

“Terminál espesífiku iha Indonézia sira dezenvolve ona ba bus ne’e rasik no oferese mós fatin ba deskansa. Enkuantu Timor-Leste nian seidauk no provizoriamente bus sei para lai iha resintu Ministériu Transporte no Komunikasaun, Caicoli, no pasajeiru sei hatún iha Timor Plaza”, nia esplika.

Babadok Express ne’ebé atu halai Dili- Kupang, hahú loron 30 marsu, kuarta (29/3/2023). Imajen Tatoli/António Gonçalves.

Billete ba Babadok Express disponivel ona iha edifísiu AEMTL nian iha Acait, maibé mós bele sosa liuhosi online ka pájina facebook AEMTL nian.

Atividade lansamentu ba opersaun Babadok Express hala’o iha CCD no partisipa direta hosi Ministru Transporte no Komunikasaun (MTK), Jose Agustinho da Silva, Vise-Ministru Komérsiu no Indústria, Domingos Lopes Antunes, Prezidente Asosiasaun Emprezariál Feto (AEMTL, sigla portugés), Hergui Luina Alves, Embaixadór Indonézia iha Timor-Leste, Okto Dorinus Manik, Prezidente Kámara Komérsiu Indústria Timor-Leste (CCI-TL), Jorge Manuel de Araújo Serrano, no reprezentante hosi Diresaun Nasionál Transporte Terrestre (DNTT).

Notísia relevante : https://tatoli.tl/2022/12/27/membru-aemtl-investe-iha-transporte-fronteira-terrestre-ho-valor-360-000/

Jornalista: Antónia Gusmão

Editora: Maria Auxiliadora

iklan
iklan

Leave a Reply

iklan
error: Content is protected !!