DILI, 15 fevereiru 2023 (TATOLI)—Diretór Nasional Transporte no Terrestre (DNTT), iha Ministériu Transporte Komunikasaun (MTK), António da Costa, hateten iha loron 30 marsu 2023 ne’e, Governu sei halo lansamentu ba Bus DAMRI ho Babodok Express ho rute Dili, Timor-Leste no Kupang NTT (Nusa Tengara Timur), Indonézia.
Nia dehan, bus DAMRI ne’e rasik, loloos atu lansa iha 23 dezembru 2022, maibé Timor-Leste (TL) seidauk prontu tanba bus Timor-Leste nian konstrui iha Xina no agora foin iha dalan mai TL. Ho ida ne’e, tinan ne’e foin bele halo lansamentu. Tanba tuir akordu ne’ebé Governu rua ne’e halo bus hosi Indonézia ho rute mai TL. No bus hosi TL nian sei halo operasaun ba fali Indonézia.
“Ita sei halo lansamentu ba bus DAMRI hosi Indonézia no bus TL nian ho naran Babadok Express, iha 30 marsu, no Billete ba bus DAMRI ne’e rasik, hosi TL nian deside folin hahú hosi $40 to’o $45. No hosi Indonézia fó kustu mai hahú ho Rp.250.000 to’o Rp.350.000,” António da Costa, dehan ba Agência Tatoli, iha nia-knaar fatin, DNTT Balide, Dili, kuarta ne’e.
Notisia relevante : Membru AEMTL investe iha transporte fronteira terrestre ho valór $360.000
Nia dehan, tuir akordu hosi Governu rua ne’e, bus ne’e rasik hosi Indonézia hatama lima no Timor mós tau lima maibé tanba TL foin iha rua rua, mak parte Indonézia mós hatama uluk rua mai TL.
Nia dehan, bainhira bus DAMRI halo ona operasaun Governu deside ona fatin tula pasajeiru no hatun pasajeiru mak iha portu Dili. Signifika, tula pasajeiru sira mai hatun iha ne’ebá no tula pasajeiru sira atu ba mós iha ne’ebá.
Kona-ba bus hosi TL, sosa hosi membru Asosiasaun Emprezariál Feto Timor-Leste (AEMTL, sigla portugés) hamutuk empreza 21 ne’ebé investe iha Konsórsiu Babadok Translo.
Membru AEMTL hamutuk 21 mak investe iha transborder, Indonézia nian mai ho DAMRI no Timor-Leste nia bus ho naran Babadok Express.
Notisia relevante : Governu sei prepara terminál molok operasionaliza bus DAMRI
Membru AEMTL investe ba bus ne’e, no ninia estimasaun bus ida ho valór $120.000. Ho nune’e ba bus tolu hamutuk $360.000.
Jornalista : Arminda Fonseca
Editora : Armandina Moniz
