DILI, 27 dezembru 2022 (TATOLI)–Membru Asosiasaun Emprezariál Feto Timor-Leste (AEMTL, sigla portugés) hamutuk empreza 21 ne’ebé investe iha Konsórsiu Babadok Translo halo investimentu iha transporte fronteira ka transborder.
“Membru AEMTL hamutuk 21 mak investe iha transborder, Indonézia nian mai ho Damri no Timor-Leste nia bus naran Babadok Express. Membru AEMTL liuhosi konsórsiu ne’ebé ami harii iha área transporte, feto sira konsege tau osan hamutuk hodi sosa bus, daudaun mai rua no tinan 2023 aumenta tan ida, nune’e hamutuk tolu hodi responde ba projetu transborder entre Dili-Indonézia via terrestre,” Prezidente AEMTL, Hergui Luina Alves, hateten iha ámbitu Asembleia ba da-IV AEMTL, iha restaurante Ocean View, Bebonuk, tersa ne’e.
Nia dehan, bus prontu ona no manda ona espedisaun, nune’e fulan-janeiru to’o Timor hodi trata dokumentu no bele halo lansamentu.
“Tuir akordu ne’ebé iha rute ne’e Dili – Kupang maibé ami mós husu hela ba Ministériu Transporte no Komunikasaun katak bele mós Dili – Oé-cusse tanba ita-nia maluk sira Oé-cusse mós laiha transporte terrestre,” nia akresenta.
Notísia relevante: Governu sei prepara terminál molok operasionaliza bus DAMRI
Tuir planu negósiu AEMTL katak investe ba bus ida ho valór $120.000, ne’ebé ba bus tolu hamutuk $360.000.
“Ami konsidera pasu pozitivu ida tanba depois kapasita sira ein termu treinamentu, agora tempu ona atu sira ba iha negósiu realidade,” nia apresia.
Bus ne’e manufatura halo iha Xina, demora tanba personaliza espesifikasaun sira tantu hosi mákina no espesifikasaun seluk tuir padraun Eropa hodi garante bus nia durasaun.
Bus ne’e kompleta ho fasilidade hanesan toilet, WiFi, konetividade charger telemóvel, bagajen rua (ida iha leten no iha okos), Coffee machine, cool box, no full ar kondisionadu.
“Klaru katak sei iha diskusaun ho parte Indonézia, tanba sira mai investe ba Damri, entaun kualidade sira nian ladun di’ak no ami iha hela diskusaun ba presu tanba sira hakarak atu fó presu baratu liu ami. Ida-ne’e labele akontese tanba iha akordu entre país, ne’ebé la’ós atu ba hadau fali merkadu ne’ebé eziste hanesan travel sira maibé tenke fó espasu ba travel atu sira nafatin kontinua negósiu,” nia dehan.
Jornalista : Antónia Gusmão
Editora : Julia Chatarina
