iklan

EKONOMIA, COVALIMA, HEADLINE, MUNISÍPIU

Abríl, Timor Resources hahú halo teste ba progresu perfurasaun mina no gás

Abríl, Timor Resources hahú halo teste ba progresu perfurasaun mina no gás

Timor Resources halo perfurasaun iha rai-maran iha posu Feto Kmaus, Covalima. Imajen TATOLI/Celestina Teles

COVALIMA, 31 marsu  2023 ( TATOLI) -Jerente Timor Resources, Filomino Andrade, hateten iha loron 5 fulan-abríl tinan ne’e, Kompañia Timor Resources sei hahú halo teste kona-ba progresu perfurasaun mina matan posu Lafaek nune’e bele hatene ninia kuantidade mina no gas.

“Oras ne’e , daudaun ita bele hateten totál perfurasaun besik ona metru 3100, maibé atividade kontinua nafatin halo perfurasaun hodi hala’o preparativu ba teste,  ami hanoin loron 5 fulan abríl bele hahú halo ona teste perfurasaun hodi haree kapasidade gas no mina ninia kuantidade hira iha prosesu atu hala’o teste,” Filomino Andrade, informa ba  Agência Tatoli, iha posu lafaek,  sesta ne’e.

Notísia Relevante :Progresu perfurasaun posu Lafaek to’o ona metru 2,900

Tuir espetativa kompañia Timor Resource nian katak perfurasaun ne’e ho ninia kle’an sei to’o metru 3.500,  ne’ebé daudaun ne’e progresu perfurasaun to’o ona metru 3.100. Bainhira perfurasaun atinje ona metru 3.500 maka kompañia ne’e sei hahú halo teste iha fulan oin.

“Ami iha espetativa no korajen maka’as perfurasaun posu ne’e kle’an to’o metru 3500 tarjetu ita-nian daudaun ne’e deste hori kalan ba oin sira kontinua halo perfurasaun tuun ba kra’ik atu bele to’o tarjetu,” nia dehan.

Nia informa ekipa tékniku lubuk ida sei mai hosi Austrália iha tempu besik hodi halo teste ba rezultadu ba perfurasaun ne’e iha inísiu fulan-abríl 2023 iha Covalima.

Durante halo perfurasaun, Nia hateten  kompañia Timor-Resources hasoru difikuldade kona-ba ekipamentu  atu apoiu prosesu perfurasaun mina no gas ne’e tanba barak tenki importa husi rai-liur  maibé, kompañia Timor Port sempre iha koordenasaun di’ak hodi aselera prosesu distribuisaun ekipamentu ne’e bá to’o iha fatin perfurasaun ho di’ak.

Entertantu, iha loron 27 fulan-outubru tinan 2021 liubá  Primeiru-Ministru, Taur Matan Ruak ofesiálmente lansa perfurasaun dahuluk ba kontratu fahe produsaun iha posu feto kmaus munisípiu covalima ne’ebé hanesan perfurasaun dahuluk iha rai maran hafoin tinan 50 Timor-Leste hetan ninia independénsia iha tinan 2002.

Notísia Relevante :Perfurasaun posu Lafaek iha Covalima hatudu sinál pozitivu

Jornalista: Celestina Teles

Editór: Agapito dos Santos

iklan
iklan

Leave a Reply

iklan
error: Content is protected !!