DILI, 03 abríl 2023 (TATOLI) – Governu disponibiliza millaun $1 hodi halo konstrusaun igreja São Paulo Lospalos, iha munisípiu Lautém.
Tanba ne’e, iha tersa-feira (04/04) Ministru Finansa, Rui Gomes, reprezenta Governu sei asina akordu ho Prezidente Komisaun ba Konstrusaun igreja foun, Júlio Maria de Jesus Canto, ho sasin hosi Pároku igreja São Paulo Lospalos, Pe. Venâncio Fátima Freitas, SDB, ba fundu transferénsia hamutuk millaun $1.
“Aban, sei iha asinatura akordu ida ho Parokia Lospalos atu harii konstrusaun igreja foun ida, depois prosede ho transferénsia osan millaun $1 ne’ebé aprova iha Parlamentu Nasionál iha tinan kotuk”, cMinistru Finansa hatete hafoin relata progresu serbisu ba Xefe Ezekutivu, Taur Matan Ruak, iha Palásiu Governu, segunda ne’e.
Verba ne’e mai husi títulu Dotasaun Jerál Estadu iha orsamentu tinan ida ne’e nian atu finansia projetu konstrusaun igreja refere.
Foin lalais, Governu selebra ona akordu ida ho Konferénsia Episkopál Timorense ba subvensaun anuál ho valór millaun $15. Osan ne’e hodi finansia atividade importante haat, hanesan edukasaun aloka 40%, sosiál 30%, governasaun ekleziál 20% no atividade relasiona ho jestaun subvensaun 10%.
Notísia relevante: https://tatoli.tl/2023/03/23/subvensaun-millaun-15-ba-cet-atu-finansia-atividade-prinsipal-haat/
Jornalista: Antónia Gusmão
Editora: Maria Auxiliadora
