DILI, 03 abríl 2023 (TATOLI)—Deputadu hosi bankada Fretilin iha Parlamentu Nasionál, Favião Oliveira, preokupa ho sistema atendimentu hosi sentru estabelesimentu faan pulsa eletrisidade iha kapitál Dili ne’ebé sai preokupasaun públiku.
“Konsumidór lamenta, ema forma naruk atu sosa pulsa ahi hein kle’ur tanba atendimentu ladi’ak, tanba ne’e EDTL presiza tau atensaun hadi’a atendimentu,” Deputadu ne’e levanta liuhosi reuniaun plenária PN, segunda ne’e.
Nia dehan, sentru venda iha estrada ninin hanesan iha Elemloi iha estrada ninin bele haree fatin estatéjia seluk hanesan fatin labele rame hodi labele difikulta transporte públiku.
Nune’e, nia husu Ministru Asuntu Parlamentár no Komunikasaun Sosiál (MAPKOMS) atu hato’o ba parte tutela atu tau atensaun.
Antes ne’e mós, Deputadu CNRT, Leandro Lobato, levanta kona-ba ajénsia faan pulsa eletrisidade, depois EDTL estabelese ema hotu antrian forma naruk loro-loron tanba liga ho liña ne’ebé difikulta tebes kle’ur, ida-ne’e ema-ne’ebé pulsa hotu ba sosa hein to’o ida oras ida ka rua, nune’e presiza tau atensaun.
Ministru Asuntu Parlamentár no Komunikasaun Sosiál (MAPKOMS), Francisco Jerónimo, rekoñese sistema faan pulsa loron hirak liubá sai preokupasaun tanba kestaun liña internet.
Durante ne’e, iha operador telekomunikasaun tolu hodi fornese liña ba nasaun ne’e tanba udan no anin nune’e difikulta liña, mezmu nune’e MAKOMPS sei informa ba EDTL tanba estabelesimentu EDTL iha sentrál la’o di’ak no dalaruma fatin faan pulsa iha dalan ninin mak sai preokupasaun uitoan.
Jornalista : Nelson de Sousa
Editór : Cancio Ximenes
