DILI, 03 abríl 2023 (TATOLI)—Meza Parlamentu Nasionál (PN), segunda ne’e, liuhosi reuniaun plenária anúnsiu no baixa proposta-lei númeru 55/V(5a)-alterasaun datoluk lei númeru 11/2009, 7 outubru, Divizaun Administrativa Territóriu ba komisaun A trata asuntu Justisa no Konstitusionál hodi fó apresiasaun inisiál.
Notísia Relevante: Governu altera Lei Divizaun Administrativa Territóriu
“Meza hakarak anúnsia admisaun no baixa ba komisaun A trata asuntu Konstituisionál no Justisa proposta-lei terseira alterasaun Divizaun Administrativa Territóriu atu halo apresiasaun inisiál relatóriu paresér prazu loron hitu,” Prezidente Parlamentu Nasionál, Aniceto Longuinhos Guterres Lopes, fó sai iha sala plenária PN.
Meza PM anúnsiu mós admisaun no baixa ba komisaun G trata asuntu Edukasaun, Juventude, Kultura no Sidadania proposta-lei númeru 54/V-Rejime Organizasaun no Prátika Desportiva Arte Marsiál, atu halo apresiasaun inisiál relatóriu no paresér prazu loron 10, no baixa mós ba komisaun A atu halo paresér setoriál,
“Ba inisiativa ida-ne’e haree hosi konteúdu loloos ne’e, atu halo apresiasaun inisiál ne’e baixa ba komisaun A tanba iha kestaun ligadu ho krime, regulamentasaun ho sira seluk, maibé tanba komisaun karegadu hela aproveita ho ida-ne’e komisaun G mak halo apresiasaun inisiá,” nia dehan.
Meza seidauk fó sai detallu kona-ba konteúdu proposta alterasaun Divizaun Administrativa Territóriu no proposta-lei Rejime Organizasaun no Prátika Desportiva Arte Marsiál tanba komisaun espesializada sira sei halo apresiasaun inisiál, ne’ebé sei halo mós audiénsia públika ho entidade relevante sira, hafoin sei diskusaun iha plenária.
Notísia Relevante: Rejime organizasaun no prátika desportiva arte marsiál aprovadu
Jornalista : Nelson de Sousa
Editór : Cancio Ximenes
