DTT Bobonaro rekolla reseita rihun $37 iha trimestre dahuluk
MALAIANA, 04 abríl 2023 (TATOLI) – Diresaun Transporte Terrestre (DTT), munisípiu Bobonaro, iha trimester dahuluk hahú hosi fulan Janeiru to’o marsu tinan 2023 rekolla reseita hamutuk rihun $37-resin ba kofre estadu.
Diretór DTT munisípiu Bobonaro, João Paulo Henriques Baptista, esplika, reseita hirak-ne’e rekolla liuhosi atividade atendimentu lisensa veíkulu, inspesaun veíkulu, lisensa karta kondusaun no lisensa trajetu.
Notísia relevante: DTT Bobonaro husu inan-aman kontrola oan kondús karreta-motorizada
“Ita kontribui ona reseita ba kofre estadu hamutuk $37-resin, iha janeiru iha hetan $14 mil. fevereiru ita hetan $12 mil resin, depois marsu nian agora sira elabora hela, maizumenus iha $5 mil liu, inspesaun iha $6 mil resin, rejistu $1 mil no lisensa trajetu iha $200,” nia informa ba Jornalista Tatoli, iha Maliana, kuarta ne’e.
Maske diresaun ne’e kontribui reseita ba estadu kada tinan, maibé nafatin hasoru difikuldade kona-bá limitasaun mobiliáriu, kadeira ho meza, no laiha transporte operasionál atu masimiza serbisu iha terrenu, liuliu atu halo manutensaun, subtituisaun no aumenta sinál tránzitu.
“Ami hato’o ona pedidu tuir kapitál menór, no ami-nia diresaun nasionál lojístika, maibé sira dehan ba tinan ida-ne’e, ita laiha kapitál menór, ne’ebé nafatin mantein tau iha planu pelumenus tinan oin ne’e bele hetan konsiderasaun hodi responde ba preokupasaun,” João Paulo haktuir.
Diretór ne’e dehan, daudaun ne’e diresaun ne’e mos halo hela atendimentu ba blanku libretes no karta kondusaun orijinál tanba foin hetan distribuisaun hosi nasionál ho kuantidade ne’ebé disponivel hela atu atribui ba komunidade sira.
Tuir dadus blanku orijinál, karta kondusaun ne’ebé disponivel hela hamutuk rihun-haat, enkuantu ba dokumetu librete ka STNK orijinál hamutuk rihun-ualu.
“Ha’u hanoin katak númeru atribuisaun ba STNK mai ona iha 4.000, ba maluk sira-ne’ebé mak sei lori librete ka SNTK provizóriu bele hakat mai oinsa bele imprime librete orijinál, nune’e mos ba karta kondusaun ba maluk sira-ne’ebé sei uza provizóriu karik bele hakat mai troka orijinál,” João Paulo apela.
Enkuantu atendimentu kona-bá xapa-matrikula orijinál sei sentraliza iha nasionál tanba ligadu ho importasaun, bainhira karreta ho motorizada tama mai Timor-leste Diresaun Nasionál mak fó númeru xapa-matríkula, maibé DTT munisípiu Bobonaro nafatin atende rejistru troka naran no duplikadu.
Notísia relevante: DTT Bobonaro rekolla reseita rihun $95-resin iha 2022
Jornalista : Sergio da Cruz
Editór : Evaristo Soares Martins
