OÉ-CUSSE 04 abríl 2023 (TATOLI) – Komandu Polísia Nasionál Timor-Leste (PNTL), Rejiaun Administrativa Espesiál Oé-Cusse Ambeno (RAEOA), segunda ne’e realiza simulasaun tátika uza forsa hodi asegura atividade kampaña eleitorál no eleisaun parlamentár tinan ne’e iha rejiaun refere.
Notísia relevante: PNTL Oé-Cusse preparadu asegura kampaña no eleisaun parlamentár
Komandante PNTL Rejiaun Oé-Cusse, Superintendente Xefe Polísia, Mateus Mendes Assunção, informa, atividade simulasaun ne’e nu’udar matéria ikus ba formandu na’in-32 hafoin kompleta formasaun durante loron tolu, hahú iha loron sesta, 31 marsu to’o segunda loron 04 abríl, nu’udar prátika atu prevene konflitu bainhira akontese iha loron eleisaun.
“Ohin realiza simulasaun tanba ita hetan transferénsia koñesimentu hosi parte rua, tantu Polisia Unidade Espesiál (UEP) no sentru formasaun Polísia, atu prepara efetivu sira ho própriu hasoru kampaña no eleisaun parlamentár tinan ne’e iha Oé-Cusse,” Mateus Mendes informa, iha Komandu PNTL Oé-Cusse.
Dirijente PNTL Rejiaun Oé-Cusse ne’e, dehan, matéria prinsipál ne’ebé hetan durante loron tolu iha formasaun, aplika ho profisonál, garante situasaun no prontu atu serbí ba sidadaun hotu.
“Karik situasaun reál akontese, PNTL forsa seguransa nasaun nian, prontu atu asegura, labele husik situasaun ida sai instabilidade, ida-ne’e mak komandu ko’alia ba formandu sira, situasaun saida de’it maka atu mosu PNTL prontu atu asegura, la’ós PNTL de’it, maibé populasaun tomak mós presiza fó apoiu tanba estabilidade nasaun no rejiaun Oé-Cusse, ne’e iha ita-hotu nia liman,” nia fó hanoin.
Dirijente PNTL Rejiaun Oé-Cusse ne’e, konfirma, atu garante segunransa másimu iha kampaña eleitorál no eleisaun parlamentár, Komandu PNTL Oé-Cusse sei husu apoiu hosi Polísia Unidade Fronteira (UPF), tanba membru efetivu daudaun ne’e iha Oé-Cusse la sufisiénte atu kobre hotu territóriu Oé-Cusse.
“Membru PNTL la sufisiénte tanba ha’u iha de’it na’in-137, maibé la taka dalan mai ha’u, tinan-tinan ha’u sempre husu apoiu hosi komandante UPF liuhosi Komandante Jerál fó despaxu atu UPF bele apoiu iha rejiaun Oé-Cusse,” nia katak.
Iha biban ne’e, Komandante Polísia Unidade Espesiál (UEP), Inspetór Polísia, Alcino Silvano, hatete, atividade formasaun ne’e, programadu hosi Komandu Jerál, liuhosi Komandante Operasaun no Komandante Pesoál Formasaun, hodi atualiza ba munisípiu sira kona-bá uza forsa bazea ba iha direitu umanu.
“Treinamentu (formasaun) ne’e ba komandu munisipíu 13 inklui Oé-Cusse, lisaun ne’ebé maka fó partisipante sira, primeiru kona-bá atualizasaun uza forsa bazea ba iha direitu umanu, ne’e fasilita hosi sentru formasaun polísia, no tékniku manutensaun orden públiku sesaun formasaun iha terrenu fasilita hosi EUP,” nia katak.
Entretantu, formasaun durante loron tolu ne’e, partisipa hosi formandu na’in-32, mai hosi eskuadra sub-rejiaun haat, Oésilo, Pássabe, Nítibe no Pante Makasar inklui Komandu Kuartél Jerál PNTL Oé-Cusse.
Notísia relevante: Eleisaun prezidensiál hela de’it loron tolu, PNTL Oé-Cusse iha de’it karreta ida
Jornalista : Abílio Elo Nini
Editór : Evaristo Soares Martins
