DILI, 04 abríl 2023 (TATOLI) – Primeiru-Ministru (PM), Taur Matan Ruak, husu ba estudante sira ne’ebé mak selesionadu ba programa bolsa Hakbiit no Parsiál atu aproveita oportunidade didi’ak hodi estuda, nune’e termina estudu ho rezultadu di’ak.
“Hakarak hato’o mensajen espesiál ba ha’u-nia oan [bolseiru] sira katak aproveita másima oportunidade tan mai dala ida de’it no nunka mai dala-rua. Hanesan mós ita mate, mate dala-ida de’it, nunka mate dala-rua. Tanba ne’e, inan-aman sira, ha’u rasik ho ha’u-nia membru Governu, ami hotu reza para imi susesu tanba ami-nia esperansa mak imi, aban-bainrua dezenvolve no lori ita-nia nasaun bá oin”, Taur hateten iha ámbitu asinatura kontratu ho bolseiru sira, iha Sentru Konvensaun Dili, tersa ne’e.
Matan Ruak enkoraja nafatin atu estudante, liuliu bolseiru sira ne’ebé hetan oportunidade atu uza tempu ho di’ak hodi estuda.
“Jerasaun sira troka malu, kuandu jerasaun sira tuan idade tun, imi-nian sa’e. Responsabilidade ida todan loos katak tenke estuda to’o dukur no mate iha livru-nia leten”, nia dehan.
Eis-Xefe Estadu ne’e mós husu ba estudante hotu atu labele gasta tempu ba rede sosiál, hanesan Facebook no WhatsApp tanba la ajuda. “Nia kompleta iha buat ruma, maibé nia ladetermina imi-nia futuru tanba ema dehan tempu ne’e osan mean, tempu ne’e moris, lakon minutu ida liu ona no larekupera. Tanba ne’e, aproveita tempu no konsentra ba imi-nia edukasaun”, nia fó hanoin.
Matan Ruak salienta matenek, abilidade, koñesimentu no kompeténsia ne’e hanesan mós matéria ida ema halo iha komérsiu internasionál. “Iha ita-nia rain iha selu asesór, tékniku no jurista para ajuda ita”.
Xefe Ezekutivu esplika katak Governu Daualuk estabelese ministériu ida tau-matan ba Ensinu Superiór ne’e rasik no iha tinan barak ona estabelese Fundu Dezenvolvimentu Kapitál Umanu hodi prevee verba iha Orsamentu Jerál Estadu liu millaun $300 no ezekuta ona millaun $200-resin, ne’ebé forma ema liu rihun 100 iha área oioin.
“Maibé lato’o no presiza atu ita kompleta, entaun Governu Daualuk kompleta ho kriasaun programa ba ema kbiit-la’ek sira. Tanba iha ema barak nia oan hakarak eskola maibé inan-aman sira laiha kbiit. Espera katak Governu tuirmai haboot liután programa ne’e”, nia salienta.
Fundu Dezenvolvimentu Kapitál Umanu (FDCH, sigla portugés) atribui, iha tersa ne’e, kontratu ba bolseiru Hakbiit no Parsiál hamutuk 1.683 ba tinan akadémiku 2023.
Iha atividade ne’e reprezentante bolseiru kada munisípiu asina kontratu ho universidade privada sira ne’ebé Governu kontrata mak hanesan Dili Institute Tecnology (DIT), Institutu Superiór Kristál (ISC), Institutu Siénsia Saúde (ICS), Universidade Orientál Timor Lorosa’e (UNITAL), Institutu Profisionál Canossa (IPDC), Universidade Katólika Timorense (UCT), João Saldanha Institute no Institute off Business (IOB).
Notísia relevante: Estudante 645 hosi Baucau submete dokumentu atu asesu bolsa hakbiit
Jornalista: Antónia Gusmão
Editora: Maria Auxiliadora
