BTL,E.P kontrata kompañia fornese bee-moos ba komunidade Baguia no Quelicai
DILI, 05 abril 2023 (TATOLI)— Bee Timor-Leste Empreza Públika (BTL,E.P) kontrata kompañia, Hezeldan Unipessoal Lda joint venture ho Milcha Unipessoal Lda, no Nautetu Fátima Unipessoal Lda, hodi implementa Projetu Konstrusaun Sistema bee-moos iha postu-administrativu Baguia no Quelicai, munisípiu Baucau.
Prezidente BTL,E.P, Carlos Peloi dos Reis, husu kompañia sira, atu kumpri regra ne’ebé estabelese ona iha kontratu laran, no tenke finaliza obra fíziku, tuir tempu ne’ebé parte rua (BTL, E.P no kompañia implementadór) konkorda ona.
“Ha’u husu kompañia implementadór sira, tenke garante mós kualidade projetu ne’e rasik, nune’e komunidade bele uza bee ba tempu naruk. Tanba ita hotu hatene bee importante ba ita-nia komunidade,” Carlos Peloi dos Reis, hateten, iha salaun Caicoli, Dili, tersa ne’e.
Carlos Peloi dos Reis mós husu kompañia sira atu koopera ho BTL,E.P nomós autoridade lokál sira no tenke mantein komunikasaun nune’e, bainhira akontese problema ruma iha terrenu durante implementasaun projetu fíziku, bele rezolve lalais no sei la prejudika obra fíziku iha terrenu.
“Ha’u husu Autoridade postu-administrativu Baguia, Quelicai no suku sira, atu servisu hamutuk ho BTL, E.P no kompañia sira, nune’e bainhira implementa projetu fíziku iha terrenu, buat hotu la’o di’ak,” nia dehan.
Iha fatin hanesan, Administradór postu-administrativu Quelicai, Mateus Soares Cabral, fo agradese ba BTL,E.P tanba prosesu atu dada bee ba komunidade liuhosi prosesu naruk maibé ohin loron konsege hetan duni kompañia hodi implementa projetu konstrusaun bee-moos iha Quelicai.
“Hanesan autoridade lokál prontu atu servisu hamutuk ho kompañia no BTL, E.P hodi implementa projetu bee-moos to’o susesu. Ha’u garante sei laiha impedimentu ruma durante implementasaun projetu fíziku iha terrenu. Tanba dada bee mós ba Quelicai ne’e, signifika atu fasilita nesesidade povu nian iha Quelicai,” nia dehan.
Administradór Postu Administrativu Baguia, António dos Ramos, mos hato’o agradese ba BTL, E.P tanba bele aprova ona projetu bee-moos, ne’ebe implementa iha sira-nia postu, hodi hakmaan populasaun sira-nia preokupasaun durante ne’e.
Iha fatin hanesan, Diretór Kompañia Nautetu Fátima Unipessoal Lda, Maria Madalena dos Santos Fátima, mos fo agradese ba BTL, E.P tanba bele fó ona konfiansa ba sira, hodi implementa projetu konstrusaun sistema bee-moos iha Quelicai.
“Ami promete iha tempu badak sei mobiliza materiál ba fatin konstrusaun nian, atu hahú halo servisu no prontu hodi ezekuta no finaliza projetu ne’e tuir tempu ne’ebé estabelese ona iha kontratu. Maibé, depende mós ba kondisaun klima ka forsa natureza ne’ebé sei mosu, hodi difikulta servisu fíziku iha terrenu,” nia dehan.
Maibé hanesan kompañia nafatin esforsu kualker situasaun saida de’it mak akontese iha terrenu, tanba ne’e sira nafatin husu kooperasaun servisu entre BTL, E.P no autoridade lokál sira atu servisu hamutuk.
Enkuantu Projetu Konstrusaun Sistema Bee Moos iha Postu Administrativu Baguia ne’e kaer hosi kompañia Hezeldan Unipessoal Lda joint venture ho Milcha Unipessoal Lda ho nia orsamentu $844.640,87 no durasaun tempu fulan neen.
Alende ne’e, kompañia Nautetu Fátima Unipessoal Lda, sei kaer obra kona-bá Projetu Konstrusaun Sistema Bee Moos ba iha postu-administrativu Quelicai, ho durasaun tempu fulan neen no orsamentu $518.518,45.
Projetu sistema bee-moos iha Baguia nian sei kobre iha suku tolu, hanesan suku Alawa Leten, Alawa Kraik no Haekoni, postu-administrativu Baguia Villa ho totál populasaun 2.950, inklui sei fornese mós bee ba instituisaun sira hanesan, postu saúde, eskola no igreja.
Enkuantu Projetu Sistema Bee-moos iha Quelicai nian sei benefisia ba populasaun sira iha postu-administrativu Quelicai Villa no sei fornese mós bee ba instituisaun sira hanesan postu saúde, eskola no igreja.
Jornalista : Arminda Fonseca
Editora : Armandina Moniz
