BAUCAU, 07 abríl 2023 (TATOLI) – Administradór Diosezanu Dioseze Baucau, Padre Alipio Pinto Gusmão, iha selebrasaun loron Sesta-feira Santa, husu sarani hotu atu halo reflesaun kona-ba símbolu no signifikasaun kona-ba Krús.
Tuir amo, hosi Krús sarani sira hetan valór salvasaun no obediénsia katak halo tuir Maromak nia hakarak nune’e hetan salvasaun. No, Krús sinál vitória tanba Maromak oan Jesus Kristu mate iha krús liuhosi ran no bee ne’ebé sulin halo sarani hotu moris hias.
“Valór krús, nia signifika, transforma tanba Jesus Kristu, uluk ba ema kriminozu sira agora Krús nia valór no signifika muda tanba ema sala-laek, mate iha Krús, ,” Administradór Diosezanu Dioseze Baucau hateten iha Igreja katedrál Dioseze Baucau Vila antiga, sesta ne’e.
Padre Alipio mós haklaken, signifika krús tuir ema Judeu sira mak fatin ba ‘liman naruk’ no kriminozu sira bainhira hetan kastigu tanba halo revolta hasoru liurai Cesar iha tempu Roma.
Maibé ho Jesus nia mate konsege transforma krús ba fatin hodi hetan salvasaun tanba Jesus ema ne’ebé sala laek, inosente to’o kondena liuhosi tribunál no ikus mate iha Krús.
“Krus mak hanorin ita bainhira hasoru difikuldade, sofrementu nafatin iha dalan ba ksolok nia, dalan ba moris di’ak no rohan laek nia tanba ne’e ita sempre tau esperansa iha krus,” Padre Alipio Gusmão akresenta.
Reflesaun seluk, Jesus nu’udar Maromak maibé nu’udar mós ema, senti situasaun ne’ebé todan tebes, hanesan evanjellu haktuir katak Jesus kosar hanesan ran ne’ebé sulin tun, nia ta’uk hanesan ema tolo husu ba Aman Maromak bele karik hadook tiha terus ne’e hosi Nia maibé Jesus halo orasaun hodi hateten ‘Aman se bele karik hadook tiha kalis ne’e hosi ha’u maibé halo tuir de’it ita-boot nia hakarak’.
“Jesus nia liafuan ikus hateten halo tuir mak ita-nia hakarak la’ós hau-nia hakarak, liafuan ne’e mak konklui akontesementu no terus tomak tolo mate tanba obedese ba Maromak Aman nia planu atu ita bele moris, hetan diak no moris rohan laek,” Padre Alipio Gusmão hateten.
Pontu reflesaun ikus mak bainhira soldadu sira hakbesik ba Jesus sona nia sorin, ne’ebé sulin sai ran no bee. Ran katak símbolu eukaristia nian no bee símbolu batizmu ne’ebá hosi ne’e mak halo igreja moris.
“Jesus nia futar fuan sorin mak iha eukaristia no Igreja moris, Igreja moris hosi eukaristia tanba nia fundamentu mak hosi Jesus nia fuan sorin sulin ran no bee símbolu batizmu no hosi batizmu Igreja moris,” Padre Alipio Gusmão hateten.
Entertantu, selebrasaun Sesta-feira santa, sarani parokia Santo António vila antiga, Dioseze Baucau realiza viasakra moris hodi hanoin hikas Jesus Kristu nia mate iha kruz hahú hosi ensinu báziku São Domingos Savio too iha Igreja katedrál antes halo adorasaun ai-krus.
Jornalista : Natalino Belo
Editór : Rafael Ximenes de A. Belo
