Governu atribui viatura 18 ba STAE munisípál-nasionál apoiu Eleisaun Parlamentár

DILI, 11 abríl 2023 (TATOLI)–-Governu liuhosi Sekretariadu Tékniku Administrasaun Eleitorál (STAE), hamutuk ho Ministériu Administrasuan Estatál (MAE), tersa ne’e, atribui viatura 18 ba STAE munisípiu 13 inklui STAE Rejiaun Administrtaiva Espesiál Oó-Cusse Ambeno (RAEOA) no STAE nasionál, hodi apoiu atividade prosesu eleisaun lejislativa nian.
Notísia Relevante: Jornalista TATOLI, I.P-RTTL, E.P bele vota iha fatin kobertura
“Karreta ne’ebé ita sosa hanesan ámbitu ida hodi ita halo prepasaun ba eleisaun parlamentár nian. Ida-ne’e eintermu reforsa ba fasilidade hanesan transporte ba prosesu eleisaun ne’e rasik, tanba servisu eleisaun ne’e nesesita dezlokasaun oioin tantu nasionál ba munisípiu no munisípiu ba sentru votasaun sira iha aldeia no suku sira, hodi halo transportasaun materiál, halo edukasaun votante, tanba ne’e ita sosa karreta ne’e,” Diretór Jerál STAE, Acilino Manuel Branco, hateten ba Ag6encia Tatoli, iha nia kna’ar fatin, Caicoli, Dili.
Responsavél ne’e hateten, iha eleisaun lejislativa ne’e presiza duni tranporte ne’ebé mak bele reforsa tan viatura sira seluk hodi halo atvidade hotu-hotu liga ho eleisaun ne’e.
“Ho ida-ne’e mak ita hetan aprovasaun orsamentu kuaze rihun $600-resin hodi sosa viatura hamutuk unidade 18. Hosi karreta unidade 18 ne’e kompostu hosi 16 double cabin ne’ebé sei fahe ba munisípiu 13 inklui Rejiaun Administrativa Espesiál Oé-cusse Ambeno (RAEOA) no ba nasionál,” Diretór Jerál ne’e dehan.
Hosi viatura sira-ne’e, nai dehan, sei halo operasionál nasionál tanba STAE nia viatura operasionál iha nasionál barak mak identifika hosi patrimóniu no barak mak rekolla ona hosi patrimóniu iha tinan kotuk, tanba ne’e STAE sosa hodi apoiu tan viatura seluk.
“Viatura seluk mak tipu kamioneta box ne’e hodi asegura transportasaun materiál sensitive sira. Nune’e husu Diretór sira uza viatura ne’e ho didi’ak tanba osan povu nian mak hodi sosa entaun karreta ne’e ba halo de’it atividade prosesu eleisaun nian,” nia dehan.
Viatura sira-ne’e sei muda nia matrikula no ho marka Governu nian, nune’e tarde liu sesta ka sábadu bele haruka ona ba munisípiu hodi halo servisu.
Jornalista : Osória Marques
Editór : Cancio Ximenes

