DILI, 11 abríl 2023 (TATOLI) – Ministru Edukasaun, Juventude no Desportu, Armindo Maia, hatete ministériu finaliza ona lista benefisiáriu bolsa méritu no hein de’it publikasaun naran iha Jornál Repúblika atu halo pagamentu.
“Pagamentu bolsa méritu kle’ur, tanba naran sira ne’e tenke publika iha Jornál Repúblika no kapasidade Jornál Repúblika nian labele akumula naran benefisiáriu 13.517 sira ne’e hotu. Ida ne’e mak problema, ida ne’e mak kle’ur”, Armindo Maia hatete hafoin relata progresu serbisu Ministériu Edukasaun ba Primeiru-Ministru, Taur Matan Ruak, iha Palásiu Governu, tersa ne’e.
Ministru hatutan naran sira atu simu bolsa méritu ne’e kompletu ona no hein de’it publikasaun iha jornal repúblika hodi hahú ona pagamentu.
“Kuandu ida ne’e mosu, ba ami laiha problema tanba ami haruka hotu ona naran, problema ne’e mak ba benefisiáriu sira tanba sira hein to’o bainhira”, nia afirma.
Atribuisaun bolsa méritu ba estudante mellór klasifikadu prevee iha Lei Grande Opsaun no Planu ne’ebé aprova ona iha Parlamentu Nasionál, no Ministériu ezekuta bazeia ba Dekretu-Lei n.u 35/2022 no diploma ministeriál n.u 43/2023 ho ninia medida sira.
Ministériu Edukasaun prevee iha orsamentu tinan kotuk liu millaun $7 ba Programa Bolsa Méritu ba estudante mellór klasifikadu iha nivel nasionál no munisipál.
Notísia relevante: https://tatoli.tl/2023/03/27/mejd-sei-simu-reklamasaun-bolsa-meritu-hosi-24-marsu-08-abril/
Jornalista: Antónia Gusmão
Editora: Maria Auxiliadora
