DILI, 13 abríl 2023 (TATOLI)–Vise Xefe bankada Partidu Libertasaun Populár (PLP) iha Parlamentu Nasionál, Francisco Vanconcelos, hateten daudaun ne’e partidu prepara hela karta hodi haruka ba meza Prezidente PN atu inísia perde mandatu ka lakon mandatu Deputadu Cornelio Gama ‘L7’.
Notísia Relevante: Deputada Domingas substitui L7 ba kargu Xefe Bankada PLP
“Ami haruka legál sira prepara hela karta, haree nia kestaun legál sira-ne’e, depois haruka karta, no meza (PN) hein de’it no meza inísia hahú bazea ba karta hosi partidu,” nia hateten ba jornalista sira iha PN, kinta ne’e.
Desizaun partidu foti tanba atuál Deputadu L7 hosi bankada PLP halo deklarasaun hodi fila-fali hamutuk ho partidu istóriku FRETILIN, mezmu ida-ne’e liberdade ba Deputadu L7 maibé daudaun ne’e Deputadu iha PN reprezenta hosi partidu PLP, nune’e partidu iha regra atu foti hasoru inklui rejimentu PN rasik mós iha regra.
Iha loron hirak liu bá, partidu hato’o karta ba meza PN hodi hapara Deputadu Cornelio Gama L7 ne’ebé hanesan Xefe Bankada PLP iha PN hodi substitui fali Deputada Domingas dos Santos.
Iha reuniaun plenária estraordináriu iha kuarta (12/04) horisehik, meza PN liuhosi Prezidente Parlamentu Nasionál, fó sai katak bazeia partidu PLP hato’o mai iha Prezidente PN katak iha hahú iha 11 abríl 2023, Deputadu L7 la’ós ona Xefe Bankada Parlamentár no troka hosi Deputada Domingas dos Santos.
Vise bankada ne’e seidauk fó sai Deputadu foun sé mak atu troka fali Deputadu L7, hodi hein prosesu perde mandatu ne’e la’o ona.
Mezmu nune’e, Deputadu Cornelio Gama lamenta ho karta ne’e tanba partidu la halo komunikasaun ruma ho nia-parte, maske nune’e prontu nafatin simu desizaun refere.
Hatán ba ida-ne’e, Vise Bankada, Deputadu Francisco Vanconselos, hateten la presiza informa atu Deputadu L7 hatán ka lae, maibé ne’e desizaun partidu nian nu’udar Deputadu kumpre de’it.
“Xefe bankada ne’e hanesan koordena de’it sasán sira iha bankada laran, to’o ikus Xefe Bankada la deside buat ida no deside desizaun hotu iha bankada ne’e kolejiál,” nia dehan.
Notísia Relevante: PLP deside hapara Deputadu L7 hosi Xefe Bankada
Jornalista : Nelson de Sousa
Editór : Cancio Ximenes
