DILI, 14 abríl 2023 (TATOLI)-Prezidente Komisaun Nasionál Juridisaun (KNJ) Partidu FRETILIN, Joaquim da Silva, husu ba Prezidente Repúblika, José Ramos Horta, atu hala’o ninia kna’ar ho neutru ba povu tomak tuir konstituisaun RDTL.
“Ami nia preokupasaun no lamentasaun ba Prezidente nu’udar Xefe Estadu no símbolu nasaun ne’ebé garante ba independénsia nasionál, ba unidade Estadu nian no mós ba regular funsionamentu instituisaun Estadu nian. Figura Xefe Estadu tenke hako’ak komunídade polítika sira hotu no organizasaun hotu hanesan ho forma estadual. No aman nasaun ne’ebé neutro ba povu tomak no kumpre lei inan no lei oan sira hotu ne’ebé vigora,” Nia hateten ba jornalista sira liu hosi konferénsia imprensa iha sede CCF, Comoro, sesta ne’e.
Notísia Relevante:PR Horta partisipa konsolidasaun fó agradeseimentu ba apoiante iha Baucau
Nia dehan, daudaun ne’e mosu polémika boot ba públiku, tanba publikasaun iha media sosiál ne’ebe hateten Xefe Estadu marka prezensa iha atividade konsolidasaun partidu CNRT nian iha loron 09 fulan-abríl 2023 iha munisípiu Baucau.
Nia duvida ho prezensa Xefe Estadu nian iha fatin ne’ebá iha ámbitu konsolidasaun partidu CNRT nian, maske ho objetivu maka atu selebra jantar konfraternizasaun hodi fó agradesimentu ba apoiante sira ne’ebé fó ona votu iha eleisaun prezidensiál iha tinan 2022 liubá.
“Pelo kontráriu, serimónia agradesimentu ida ne’e, Na’i Prezidente maka devia halo no bolu ekipa susesu no estrutura husi partidu CNRT ba agradese, maibé partidu CNRT maka halo fali no bolu Na’i Prezidente ba selebra iha fatin konsolidasaun nian,” Nia lamenta.
Prezidente Repúblika hili direta hosi povu ho votu maioria tuir lei atu Prezidente ba povu hotu, tanba ne’e bainhira eleitu ona tenke tau-án hanesan aman ba nasaun, aman ba povu tomak, aman ba organizasaun hotu-hotu, aman ba konfizaun relijiozu hotu no aman ba partidu polítiku hotu.
“Ami KNJ mós husu atu Na’i Prezidente labele repete komportamentu ne’ebé la neutro ne’e iha oin mai, tanba imajen la di’ak ba nasaun foun ida ne’e no ba jerasaun foun sira,” nia hateten.
Partidu FRETILIN liuhosi Komisaun Nasionál Juridisaun sei hato’o keixa ba orgaun judisiáriu atu prosesa funsionáriu hosi Palasiu Repúblika ne’ebé uza Karreta Estadu hodi tula atributu partidu CNRT foin lalais.
Hatan ba preokupasaun hirak ne’e, antes ne’e, Prezidente Repúblika (PR), José Ramos Horta, deklara ninia partisipasaun iha Baucau atravez ho loron konsolidasaun partidu CNRT nian laiha relasaun, maibé vizita xefe estadu halo iha Baucau ne’e atu fo agradesimentu ba ninia apoiante sira-ne’ebé apoiu nian iha primeiru mandatu iha 2007.
“Ha’u la halo kampaña polítika maibé ha’u ba vizita Baucau tanba ha’u-nia apoiante lubuk ida iha ne’ebá dezde ha’u-nia primeiru mandatu 2007 iha Baucau-Laga. Ha’u hakarak ba tanba tinan ida resin ona ha’u la ba agradese sira, tanba ne’e ha’u ba atu agradese sira,” nia dehan.
Notísia Relevante: Pro-kontra PR Horta partisipa konsolidasaun iha Baucau
Jornalista: Nelson de Sousa
Editór: Agapito dos Santos
