CNE sei hapara partidu polítiku sira-ne’ebé realiza mini-kampaña sein koñesimentu
MALIANA, 18 abríl 2023 (TATOLI)-Vise Prezidente Komisaun Nasionál Eleisaun (CNE, sigla portugés), Domingos Barreto, hateten daudaun partidu polítiku sira hahú submete ona pedidu kona-bá oráriu atu halo atividade kampaña no mini kampaña sira nível munisípiu no postu administrativu sira.
Nia subliña, bainhira partidu polítiku sira atu halo atividade iha baze tenke submete pedidu ba CNE nasionál no munisípiu sira nune’e bele hetan aprovasaun.
Domingos fundamenta, tuir lei loron lima antes kampaña partidu polítiku sira tenke aprezenta ona fatin atu halo mini kampaña, nune’e CNE bele prepara ekipa inklui Polísia Nasionál Timor-Leste (PNTL) asegura no observa atividade refere.
Notísia relevante: CNE lansa plataforma tabulasaun dijitál ba Eleisaun Parlamentár
“Kampaña oráriu hotu tenke mai aprova hotu iha nasionál no munisípiu, agora partidu sira-ne’ebé halo sein koñesimentu, ami sei halo atuasaun no Polísia sei tún ba, ami sei haruka para,” nia informa ba Jornalista sira iha edifísiu STAE munisípiu Bobonaro, tersa ne’e.
Vise-Prezidente ne’e akresenta daudaun ne’e ekipa CNE munisípiu simu ona oráriu no halo hela verifikasaun nune’e deside fatin labele soke malu ho oráriu sira aprova iha nasionál.
“Ita sei bolu sira atu halo liña koordenasaun, atu nune’e evita partidu rua mai halo kampaña iha fatin ida de’it,” nia hateten.
Enkuantu tuir lei ne’ebé regula fatin sira ne’ebé bandu halo kampaña mak edifísiu públiku sira, ezemplu hanesan eskola, sede sukuz Igreja no seluk tán.
Maibé iha kampána eleitorál tinan ne’e CNE prefere uza fatin sira uluk ba kampaña eleisaun prezidensiál, hanesan kampu futeból iha munisípiu no postu administrativu sira.
Domingos mós apela ba partidu polítiku sira hotu,bbainhira halo kampaña atu hato’o de’it programa ba militante no Simpatizante sira.
Notísia relevante: CNE seidauk identifika militante partidu dada bandeira iha fatin públiku
Jornalista: Sergio da Cruz
Editór: Evaristo Soares Martins
