DILI,18 abríl 2023 (TATOLI) – Asosiasaun Defisiénsia Timor-Leste (ADTL) husu Governu atu kria kondisaun ba Ema ho Defisiénsia (EhD) iha eleisaun parlamentár ne’ebé sei realiza iha 21 maiu 2023.
Portavós EhD, Jacinta Ana Paula, hatete movimentu Organizasaun Sosiedade Sivíl ne’ebé halo advokasia ba direitu umanu ba demokrasia no eleisaun, organizasaun defisiénsia hirak ne’ebé serbisu ba promosaun no protesaun direitu EhD iha Timor-Leste foku ba asesibilidade no akomodasaun ho razoavel ba ema ho defisiénsia iha eleisaun parlamentár.
“Ami hakarak rekomenda kestaun importante sira ba STAE no CNE atu mellora kondisaun fízika iha sentru votasaun sira iha territóriu. Pelu menus iha kondisaun atu ema ho defisiénsia bele ezerse sira-nia direitu ho justu no dignu iha rampa simples ruma, kabina de votu badak tuir kondisaun postura ema nian no fó asisténsia téknika bainhira prezensa iha fatin votasaun”, dehan Jacinta Ana Paula afirma iha konferénsia imprensa, iha edifísiu ADTL iha Mascarinhas, tersa ne’e.
Nia dehan bainhira EhD sira to’o ona iha sentru votasaun tenke iha pesoál eleitorál sira akompaña no husu ba ema ho defisiénsia matan atu eskolla ema ne’ebé sira prefere liu atu ezerse sira-nia direitu.
Tuir Konstituisaun artigu 16 alínea 1), sidadaun hotu-hotu hanesan iha lei nia oin, no iha alínea 2), labele halo diskriminasaun ba ema ida tanba nia kulit, nia rasa, nia estadu sivíl, nia seksu, orijen étniku, nia lian, pozisaun sosiál eh ekonómiku, hanoin polítiku ka ideolojia, relijiaun, instrusaun eh nia kondisaun fízika eh mental. Iha artigu 46 garante katak sidadaun hotu-hotu iha direitu atu partisipa, hosi nia rasik eh liu hosi reprezentante ne’ebé hili tiha ona tuir demokrasia, ba vida polítika no ba asuntu públiku nian iha rai-laran.
Iha artigu 65 dehan órgaun eleitu soberania nian ho podér lokál sei hili tuir eleisaun, hosi eleisaun universál, livre, diretu, sekretu ema ida votu ida, no periódiku.
Reprezentante EhD ne’e reforsa tan katak mezmu lei eleisaun parlamentár n.u 50/V/2023 husi alterasaun Lei n.u 6/2006 ne’ebé aprova iha Parlamentu Nasionál iha loron 14 fevereiru 2023 nia finalidade mak Prezidente Repúblika veta, maibé eleisaun la’o nafatin ho Lei Eleisaun Parlamentár tuan n.u 6/2006 ne’ebé la kria kondisaun ba EhD atu vota ho segredu no justu.
“Kestaun umanidade ka ema mak partisipa iha eleisaun, liuliu ema ho defisiénsia sira ne’ebé iha limitasaun boot atu hola parte iha eleisaun parlamentár. Nune’e, liuhosi konferénsia ne’e EhD mós husu ba partidu polítiku 17 ne’ebé iha loron 19 abríl komesa ona sira-nian kampaña polítika atu valoriza nafatin EhD ho uza linguajen ka termu sira hanesan ema ho nesesidade espesiál, ema ho diferente abilidade ka ema ho defisiénsia”, sujere.
Tuir Jacinta Ana Paula, ba termu sira ne’ebé la merese atu hasai ba EhD di’ak liu polítiku sira la bele uza iha kampaña hanesan liafuan la normál, aleijadu, matan-aat ou delek, tilun-di’uk, bulak no liman-ain aat.
“Tanba linguajen hirak ne’e la merese no sei prejudika sentimentu ema ho defisiénsia nian hanesan umanu. Tanba ne’e, polítiku sira tenke utiliza linguajen ida ne’ebé valoriza EhD hanesan umanu ida hanesan mós ita-boot sira”, afirma.
Portavós EhD husu mós ba Provedoria Direitu Umanu no Justisa atu kontinua prosesa tuir dalan legál bainhira deteta iha iregularidade, krime eleitorál no violasaun ba direitu umanu, liuliu ba EhD nian hodi partisipa iha eleisaun. “Timor-Leste tenke garante eleisaun ida ho forma justu, inkluzivu, seguru ba ema hotu”, konklui.
Notísia relevante: Joven-EhD 200 partisipa semináriu hodi partisipa iha elesiaun inkluzivu
Jornalista: Tomé Amado
Editora: Maria Auxiliadora
