SEKoop inaugura sede kooperativa kréditu uniaun MHF

DILI, 18 abríl 2023 (TATOLI)—Sekretáriu Estadu Kooperativa (SEKoop), Elizário Ferreira, iha segunda (17/04) inaugura sede kréditu uniaun Maubisse Hanoin ba Futuru (CU-MHF) iha postu Maubisse, munisípiu Ainaro.
Biban ne’e, Sekretáriu Estadu konsidera ezisténsia kooperativa kréditu uniaun Maubisse Hanoin ba Futuru importante tebes, tanba ne’e husu ba estrutura sira atu tau importánsia ba edukasaun hodi dezenvolve kooperativa di’ak liu iha futuru mai.
“Imi iha ona osan signifika iha ona dana pendidikan, tanba ne’e mak estrutura tenke ba tuir formasaun no semináriu ruma atu nune’e dezenvolve di’ak liután imi-nia kooperativa,” Sekretáriu Estadu hateten liuhosi nota ne’ebé Agência Tatoli asesu, tersa ne’e.
Notísia relevante: SEKoop kapasita membru kooperativa uniaun kréditu Viqueque
Iha biban hanesan, Prezidente CU-MHF, Luciano Mendonca Nunes, informa, Governu liuhosi SEKoop apoiu osan $7.000 resin hodi halo konstrusaun sede kooperativa.
“Ami agradese ba apoiu tomak hodi realiza edifísiu ho medida 8×9, maibé gasta ba populasaun ne’e hamutuk $15.000,” nia akresenta.
Aleinde ne’e, autoridade postu Maubisse oferese rai Estadu ba hodi harii edifísiu kooperativa.
Kooperativa CU-MHF eziste iha tinan 2013 no daudaun ne’e iha membru 1.103 ho kapitál $380.349,72.
Nune’e mós, Xefe suku Maubisse, Nívio Magalhães, hateten, nu’udar líder suku, nia fó agradese ba Gabinete SEKoop tanba bele apoiu no mobiliza sidadaun hotu atubele serbisu maka’as iha área kooperativa.
“Hakarak hato’o ami-nia agradese ba Gabinete SEKoop nia apoiu tomak, liuliu ba orsamentu tanba hosi osan ne’e rasik mak bele harii sede CU-MHF. Espera ba oin buras ba nafatin,” nia tenik.
Jornalista : Arminda Fonseca
Editora : Julia Chatarina

