DILI, 18 abril 2023 (TATOLI)—Diretór Jerál Sekretariadu Tékniku Eleitorál (STAE), Acilino Manuel Branco, hateten Programa Nasaun Unida ba Dezenvolvimentu (UNDP), entrega ona tinta indelevðl 10.008 ba STAE hodi halo preparsaun ba Eleisaun Parlamentar 2023.
“Ohin, ita iha ne’e, sei sasin lori simu materiál sensitivu hanesan tinta ba eleisaun parlamentár 2023 nian,” nia dehan ba jornalista sira, iha salaun STAE, Caicoli, tersa ne’e.
Liuhosi UNDP nia apoiu no hetan orsamentu Estadu hodi garante eleisaun parlamentár ho susesu, justu, inkluzivu ho nia kredibilidade, integridade, hodi hatudu ba mundu katak Timor-Leste mós iha kualidade.
“Ohin, ita hotu sai sasin ba órgaun eleitorál nia dezempeñu no ami iha kompromisu tomak atu garante iha prosesu tomak ho forma ne’ebé transparánsia, imparsilidade, neutralidade,” nia hateten.
Komisária Komisaun Nasionál Eleisaun (CNE), Odete Maria Belo, agradese ba esforsu UNDP nian hodi ohin bele entrega tinta indelével ne’e ba STAE hodi realiza ba eleisaun parlamentár 2023.
“Ita agradese ba UNDP tanba ohin bele entrega ona tinta indelevél ba STAE,” komisária ne’e hateten.
Ministru Administrasaun Estatál (MAE), Miguel Pereira de Carvalho, dehan tinta indelevél ne’e Estadu Governu apoiu orsamentu $360.000 ho totál garafa 10.008.
“Ohin loron to’o ona iha Timor-Leste no hein atu distribui. No ida-ne’e hakarak agradese ba UNDP tanba bele fasilita no apoiu ona órgaun eleitorál hodi bele realiza eleisaun parlamentár 2023 ne’e,” MAE dehan.
Reprezentante Rezidénsia UNDP, iha Timor-Leste, Munkhtuya Altangerel, hateten tinta garafa 10.008 ne’e sei responde ba eleisaun parlamentár ne’ebé sei realiza iha 21 maiu ne’e.
“Tinta ne’e nasaun barak mak uza ona no tinta ne’e seguru liu no asegura integridade eleisaun demokrátiku ne’ebé makaas liu iha Azia no iha mundu tomak. Tinta indelevél ne’e kualidade aas no padraun Internasionál,” nia hateten.
Tanba ne’e, nia enkorja partidu polítika sira atu dezenvolve plataforma polítika ba jerasaun foun timoroan nian.
Jornalista : Osória Marques
Editór : Cancio Ximenes
