Brigadista-ofisiál eleitorál STAE Manatuto hala’o edukasaun votante ba eleitór
DILI, 19 abríl 2023 (TATOLI)—Diretór Sektretariadu Tékniku Administrasaun Eleitorál (STAE), Mariano Natalino Soares da Silva, hateten brigadista no ofisiál eleitorál STAE Manatuto hala’o edukasaun votante ba eleitór sira.
“Agora daudaun STAE Munisípiu Manatuto nian hala’o hela edukasaun votante ba eleitór sira iha territóriu Manatuto ne’ebé fasilita hosi brigada no ofisiál eleitorál sira, nune’e bele hasoru eleisaun parlamentar 2023 ne’e,” Mariano hateten ba Agência Tatoliliuhosi telefónika, kuarta ne’e.
Kona-ba materiál sensitivu no naun sensitivu ba eleisaun ne’e, nia dehan, hahú ona kompleta materiál naun sensitivu ne’ebé uza iha eleisaun Prezidensiál aat, maibé agora dadaun sira prepara hodi halo identifikasaun ba materiál sira no halo ona ajustamentu ba ida-ne’ebé falta ne’e.
Responsavél ne’e hateten, hafoin iha 12 abríl STAE Munisipál sei ba foti materiál sensitivu iha STAE nasionál, nune’e bele ajusta no hein ba eleisaun parlamentár ne’ebé sei akontese iha 21 maiu tinan ne’e.
Iha Munisípiu Manatuto, nia relata, sentru votasaun 83 no estasaun votasaun iha 98, maibé iha eleisaun Prezidensiál nian sentru votasaun iha 70 no estasaun iha de’it 87.
Jornalista : Osória Marques
Editór : Cancio Ximenes
