iklan

ELEISAUN, HEADLINE, POLÍTIKA

CI enkoraja jornalista kumpre kódigu étika durante kobertura kampaña eleitorál

CI enkoraja jornalista kumpre kódigu étika durante kobertura kampaña eleitorál

Konsellu Imprensa realiza konferénsia imprensa relasiona ho asuntu ‘Reportajen Eleitorál Mídia no Jornalista iha períodu Kampaña Polítika no Eleisaun Lejizlativa 2023”, iha salaun konferénsia CI, Quintal Boot, kuarta (19/04). Imajen Tatoli/Francisco Sony

DILI, 19 abríl 2023 (TATOLI)–Konsellu Imprensa (CI, sigla portugés) enkoraja jornalista sira hotu ne’ebé haknaar-an iha mídia imprime no eletróniku atu kumpre kódigu étika durante halo kobertura iha kampaña eleitorál ne’ebé sei realiza durante fulan ida, hahú 19 abríl to’o 18 maiu 2023.

“Konsellu Imprensa desde kedan Eleisaun Prezidensiál kria ona mata-dalan ida atu ita bele kaer hanesan guiaun, atu nune’e ita hala’o knaar ho imparsiál, laiha sadere ba A ka B, maibé ita hala’o tuir ita-nia knaar hakerek iha kódigu étika jornalizmu nian,” Konselleiru CI, Expedito Dias Ximenes, hateten liuhosi konferénsia imprensa, iha salaun CI, Kintál-boot, kuarta ne’e.

CI fó hanoin ba jornalista sira buat rua, durante kobertura iha kampaña eleitorál bazeia de’it ba mata-dalan prodús ona no kaer metin nafatin kódigu étika, jornalista sira iha karteira profesionál ne’ebé hatudu katak kredensiál hosi Estadu tau fiar ba jornalista atubele halo kobertura ho imparsialidade.

Notísia relevante : Horta husu STAE kria kondisaun ba jornalista vota livre iha eleisaun

Iha biban hanesan, Konselleiru CI, Francisco Belo Simões, konsidera CI iha dever fó hanoin ba jornalista sira atu kontinua tane kódigu étika durante halo kobertura iha kampaña parlamentár nune’e labele hatudu halis ba partidu ida.

“Imparsialidade ne’e importante, profisionalizmu ita nian mak impasialidade, katak kuandu ita halo knaar ho imparsialidade ita sei kontribui ba ita-nia profisionalizmu”, nia argumenta.

Nune’e, Konselleiru ne’e husu mós ba mídia sira ne’ebé halo live streaming tenke atensaun hodi nune’e labele viola kódigu étika tanba dala ruma bainhira live streaming la atensaun ho di’ak bele kontribui hamosu disturbu públiku tanba fó sai mensajen provokativu.

“Liu-liu evita publika deklarasaun rasizmu sira. Tanba ne’e mak apela ba mídia sira ne’ebé uza plataforma online atu atentu didi’ak hodi nune’e labele viola prinsípiu universál jornalizmu nian,” nia fó hanoin.

Kódigu étika jornalístika

Sira ne’ebé hala’o atividade jornalístika iha Timor-Leste kompromete-an atu:

  1. Defende sidadaun nia direitu atu asesu ba informasaun no buka lia-loos;
  2. Fó hatene faktu sira ho rigór, ezatidaun, onestidade no independénsia no klarifika loloos diferensa entre notísia ho opiniaun;
  3. Kombate forma sensura hotu no defende liberdade imprensa no liberdade espresaun;
  4. Sempre hetan informasaun, dokumentu no imajem sira ho forma legál no profisionál, respeita kompromisu konfidensialidade ho fonte informasaun sira, hanesan “off the-record”, pedidu konfidensialidade no ‘embargo’;
  5. Salvaguarda prezunsaun inosénsia arguidu iha prosesu tribunál nia laran to’o hetan desizaun finál hosi tribunál no respeita vítima krimi no nia família sira nia identidade, ho kuidadu espesiál atu husik nudar anonimatu ba vítima krimi seksuál no labarik sira ne’ebé sai arguidu;
  6. Konfirma no verifika informasaun hotu ne’ebé simu molok atu publika, rekoñese informasaun sira ne’ebé sala hafoin publikasaun no hadi’a lalais kedas, respeita sidadaun nia direitu atu hatan;
  7. Defende igualdade, la halo diskrimanasaun bazeia ba rasa, etnia, fiar, dalen, estatu sosiu-ekonomiku, opsaun polítika, jéneru, seksu, defisiénsia ka ho razaun seluk;
  8. Respeita sidadaun hotu nia moris privadu, nia direitu ba onra, naran di’ak no privasidade, eseptu bainhira defeza ba interese públiku iha kauza;
  9. Rejeita forma plajiu hothotu no labele simu subornu ka oferta ruma nebe bele influénsia ninia independénsia profesionál. Identifika ho loloos fonte no autór hosi informasaun nebe nia uza no klarifika ba publiku kona-ba informasaun sira ne’ebé nia hetan tanba hetan tulun finanseiru hosi ema ka entidade ruma;
  10. Evita publika liafuan, imajen, lian ne’ebé transmite sadismu ka violénsia hasoru ema ka balada ne’ebé iha natureza hakanek públiku nia sentimentu.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!