DILI, 19 abríl 2023 (TATOLI)—Entidade seguransa sira hanesan Komandante Jerál Polísia Nasionál Timor-Leste (PNTL), Komisáriu Jerál Henrique da Costa ho Segundu Komandante Jerál, Komisáriu Pedro Belo, kuarta ne’e, hala’o vizita ba sede Konsellu Veteranu Libertasaun Kombatente Nasionál, Comoro.
Komisáriu Jerál Henrique da Costa hateten objetivu hakarak vizita veteranu hodi komprimenta no husu apoia durante mandatu hodi lori susesu ba instituisaun PNTL.
“Ami na’in-rua hanoin katak maski ami laiha esperiénsia maibé ho espíritu nasionalizmu no ami fiar katak ho ema hotu nia tulun liuliu veteranu sira-nia apoia ami na’in-rua bele atinje no kumpre mehi ne’ebé mak atribui hodi lidera instituisaun ne’e. Tanba ne’e maka intensaun vizita ne’e hakarak komprimenta veteranu sira no husu apoia atu serbisu hamutuk mantein pás no estabilidade iha ita-nia rain,” Komisáriu Jerál hateten, iha salaun Konsellu Veteranu.
Notísia relevante : Horta tau fiar ba Komisáriu Henrique da Costa no Pedro Belo lidera PNTL
Nune’e, Komisáriu Jerál komprometidu nafatin kontaktu ho veteranu sira hodi husu apoia bainhira iha situasaun balun ne’ebé presiza duni intervensaun veteranu sira nian.
“Karik ami na’in-rua halo servisu ruma mak la monu ba veteranu ka ema seluk nia laran bele fó hanoin,” nia akresenta.
Iha biban hanesan, Komisáriu Pedro Belo realsa karik desizaun Komandu nian ladun di’ak no laloos halo povu no veteranu sira nia fuan moras bele bolu ba sede veteranu hodi fó hanoin.
“Tanba ami na’in-rua mai mós hakarak atu serbí no hakarak halo buat di’ak ba PNTL,” nia komprometidu.
Prezidente Konsellu Veteranu, Vida de Jesus ‘Riak Leman’, konsidera vizita Komandu PNTL nian iha sede Veteranu nu’udar orgullu boot ida ba sira.
“Misaun veteranu nian mak asegura pás no estabilidade, ne’ebé koopera ho PNTL hodi estabiliza kona-ba pás iha Timor Lorosa’e tanba laiha estabilidade dezenvolvimentu labele la’o ho di’ak,” Riak Leman afirma.
Komandante Jerál no Segundu Komandante Jerál antes ne’e hala’o uluk ona vizita ba instituisaun balun inklui vizita Dom Virgílio Kardiál do Carmo da Silva.
Komisáriu Jerál Henrique da Costa no Komisáriu Pedro Belo nomeadu hosi Governu hodi lidera Instituisaun PNTL durante tinan tolu no simu pose iha loron 27 marsu 2023 iha ámbitu aniversáriu PNTL ba dala-23.
Jornalista : Antónia Gusmão
Editora : Julia Chatarina
