OÉ-CUSSE 19 abríl 2023 (TATOLI) – Prezidente Konsellu Veteranu Rejiaun Administrativa Espesiál Oé-Cusse Ambeno (RAEOA), Venancio Lafo ‘Vela’, informa fundu ne’ebé hetan liuhosi Servisu Apoiu Sosiedade Sivíl Auditória Sosiál (SASCAS), apoia onaNba veteranu kombatente sira hala’o atividade ekonomia no edukasaun.
Notisia relevante: Ekipa nomeasaun hosi PM hahú halo avaliasaun ba proposta 333 iha SASCAS
“Iha 2022, ita simu fundu ne’e hamutuk $38,461.53, depois ami fahe ba grupu sira, rihun $10 apoia ba grupu edukasaun ema na’in-20 no rihun $20 ba grupu ekonómia, no rihun $8, uza ba atendimentu públiku administrasaun Konsellu Veteranu nian,” Venancio Lafo, ko’alia ba Agência Tatoli iha Oé-Cusse, kuarta ne’e.
Prezidente Konsellu Veteranu Oé-Cusse, informa, apoia ne’e ba veteranu kombatente ne’ebé ho durasaun tempu 0 a 3 no o 4 a 7.
“Iha Oé-Cusse ami forma grupu ualu (8), kada grupu hetan rihun $2,500.00, ho objetivu ne’e atu hola karau hanesan paronisasi, inklui halo uma, kada grupu envolve membru na’in-haat to’o na’in-10, hodi utiliza osan ne’e atu hadi’a moris,” nia afirma.
Nune’e mós aloka rihun $10 ba grupu edukasaun, apoiu kombatente sira-nia oan ne’ebé hala’o estudu iha ensinu superiór, hamutuk ema na’in-20, kada estudante hetan $500,00 maibé ne’e ba programa ba 2022, iha tinan ne’e 2023 seidauk hatene atu kontinua ka lae.
“Ita iha grupu ida durante akompaña atu haree sira-nia seriedade implementasaun, rezultadu to’o agora ba karau balu fa’an ona, maibé fini kontinua paronisasi ne’e kontinua atu benefísia ba grupu idak-idak atu hadi’a moris, no estudante balu mós hetan ona graduasaun,” nia katak.
Entretantu, dadus benefisiáriu ne’ebé prevista iha livru 3C OJE 2023 nian, kombatente ka veteranu libertasaun nasionál rejista iha 2003 hamutuk ema na’in-363, no mártir libertasaun nasionál hamutuk ema na’in-223.
Notisia relevante: Meta Mali: Labele lori naran veteranu sai matéria kampaña
Jornalista: Abílio Elo Nini
Editór: Evaristo Soares Martins
