Ohin laiha kampaña eleitorál iha Viqueque tanba mudansa kalendáriu
VIQUEQUE, 19 abríl 2023 (TATOLI)—Partidu Polítiku (PARPOL) sira la konsege halo kampaña eleitorál loron dahuluk iha munisípiu Viqueque tanba Komisaun Nasionál Eleisaun (CNE, sigla portugés) halo mudansa ba kalendáriu.
“Ohin mosu mudansa kalendáriu, iha loron 19 abríl ne’e partidu APMT mós la halo atividade kampaña eleitorál iha Viqueque. Tuir loloos partidu KHUNTO maka hala’o atividade kampaña eleitorál hahú tuku 14:00 to’o 16:00, maibé sira la tau fatin atividade, tanba ne’e ami la konsidera no iha loron loron 21 abríl CNRT mak halo kampaña,” Diretór CNE Viqueque, Honório Cruz da Silva informa ba Agência Tatoli, iha nia knaar fatin, postu Viqueque Vila, kuarta ne’e.
Notísia relevante : CNE Viqueque husu partidu polítiku kumpre kalendáriu kampaña
Ohin loron CNE hahú distribui mudansa kalendáriu no formuláriu manuál supervizaun ba ofisiál supervizaun sira iha nível postu hadi halo akompañamentu durante prosesu kampaña eleitorál.
Aleinde ne’e CNE liuhosi diresaun informátika mós promove formuláriu supervizaun eletróniku ba ofisiál sira ne’ebé iha nível postu.
“Kona-ba kolaborasaun entre partidu polítiku, ami ho inisiativa rasik hakerek karta ba koordenadór partidu sira iha Viqueque hodi husu halo kolaborasaun, nune’e bainhira partidu sira halo kampaña karik tenke bazeia ba kalendaláriu ne’ebé partidu sira submete ona CNE. Partidu sira mós tenke kumpre regra kampaña eleitorál,” nia akresenta.
Nia dehan, CNE Viqueque konsege komunika ona partidu 10, enkuantu partidu hitu seluk seidauk konsege.
“Ami la hetan númeru telefone hosi koordenadór partidu hitu maibé ami tenta parte nasionál hodi fó partidu sira-nia númeru atu nune’e ami bele halo komunikasaun,” Honório Cruz haktuir.
Jornalista : Vitorino Lopes da Costa
Editora : Julia Chatarina
