VIQUEQUE, 18 abríl 2023 (TATOLI)—Komisáriu Komisaun Nasionál Eleisaun (CNE, sigla portugés) destakadu munisípiu Viqueque, Olávio da Costa Monteiro, husu ba partidu polítiku sira kumpre kalendáriu kampaña ne’ebé aprova ona no hadook-an hosi violénsia.
“Buka hasees-an hosi kualkér violénsia ne’ebé hamosu iha kampaña no kumpre dekretu-lei kampaña,” Komisáriu hateten iha sentru evakuasaun Beloi, tersa ne’e.
Aleinde ne’e, kalendáriu kampaña eleitorál distribui ona ba parte autoridade seguransa sira hodi akompaña atividade partidu polítiku.
“CNE simu ona kalendáriu kampaña balun hosi partidu polítiku sira. Ba hirak ne’ebé seidauk hatama kalendáriu mini kampaña karik, molok loron lima tenke hato’o kalendáriu ba ami, bainhira sira la hatama kalendáriu maka CNE sei la autoriza partidu sira hala’o atividade,” nia akresenta.
Notísia relevante : CNE Viqueque hahú identifika fatin 33 ba partidu polítiku halo atividade kampaña ElPar
Tuir kalendáriu, partidu APMT sei realiza kampaña eleitorál iha kuarta (18/04) ho tipu door to door iha munisípiu Viqueque
Atividade kampaña sei akompaña hosi CNE, Komisaun Antí-Korrupsaun (CAC, sigla portugés), Provedoria Direitu Umanu no Justisa (PDHJ, sigla portugés), Komisaun Direitu Labarik, Komisaun Funsaun Públika inklui Organizasaun Naun Governamentál.
Partidu polítiku 17 sei hala’o kampaña eleitorál hahú iha loron 19 abríl to’o 18 maiu 2023.
Jornalista : Vitorino Lopes da Costa
Editora : Julia Chatarina
