DILI, 20 abríl 2023 (TATOLI) – Partidu Repúblikanu (PR) adia kapaña eleitorál iha munisípiu Ermera, Postu Administrativu Atsabe, Suku Laclo, no Suku Talimoro, Postu Administrativu Ermera Vila ho razaun tanba akontese fenómena eklipse solár.
Vise I Sekretáriu Jerál Partidu Republikanu, Venáncio Sarmento haktuir katak kampaña eleitorál PR nian iha Munisípiu Ermera sei adia ba loron seluk.
“Relasiona ho ita-nia situasaun ne’ebé mak akontese ohin, entaun ita labele halo kampaña iha Ermera, tantu suku Laclo no suku Talimoro tanba Eklipse Solár ne’ebé mak ohin akontese iha ita-nia rai,” Sarmentu ba Tatoli via telephone, kinta ne’e.
Nia haktuir relasiona ho kanselamentu kampaña refere maka, Estrutura Nasionál Partidu Republikanu, deside hodi adia kampaña iha munisípiu Ermera ba tempu seluk.
“Ita sei submete fila fali ita-nia oráriu ba Komisaun Eleisaun Nasionál (CNE), depois mak sira sei haruka fali oráriu refere, ba CNE munisípiu no Polísia Nasionál Timor Lorosa’e (PNTL),” nia akresenta.
Relasiona ho adiamentu ba kampaña refere, Partidu Repúblikanu deside hodi hala’o de’it kampaña liu husi Konferénsia Imprensa iha Dili, hodi hato’o ninia programa no komprimisiu politíka sira.
Iha Konferénsia Imprensa ne’ebé mak halao iha Dili, Postu Administrativu Dom Aleixo, Suku Comoro, iha tuku 3:00 lorokraik Oras Timor-Leste (OTL) kinta ne’e, Partidu Republikanu hatoo ninia programa principal ne’en.
Programa hirak ne’e mak hanesan: Loke serbisu barak – 60,000 kada tinan; hasa’e produsaun doméstika, kréditu funan zero (0%) ba arikultura, manufatura ho turizmu no aloka mínimu tokon US$100 (US$100 million) iha BNCTL ba programa kréditu refere; Funu hasoru korupsaun no hamlaha; halakon pensaun vitalisa katak Membru Paralamentu Nasionál ho Ministru Partidu Republikanu sei la simu pensaun vitalisa, no la persiza hein partidu sira iha Parlamentu Nasionál hodi deside hamutuk atu hapara pensaun vitalisa; programa ikus liu mak hakoi instabilidade politíka iha Timor-Leste.
Tuir oráriu ne’ebé CNE anunsia, PR sei hala’o kampaña ba loron daruak iha Postu Adminsitrativu Atabae, Munisípiu Bobonaro.
Enkuantu, entre partidu sira hotu, Partidu Sosialista de Timor (PST) mak realiza ona kampaña politíku iha munisípiu Ermera, iha loron kuarta (19/04), horseik.
Journalist: Filomeno Martins
Editor: Nelia Borges
