iklan

MUNISÍPIU, VIQUEQUE

Governu konsidera eventu eklipse solár sai istória ba Timor

Governu konsidera eventu eklipse solár sai istória ba Timor

Abitante no turista sira akompaña eventu eklipse solár ho haksolok iha Beaço, Viqueque, kinta (20/04/2023). Imajen Tatoli/Vitorino Lopes da Costa

VIQUEQUE, 20 abríl 2023 (TATOLI)–Governu liuhosi Ministru Turizmu Komérsiu no Indústria, José Lucas do Carmo da Silva, konsidera eventu naturál eklipse solár ne’ebé akontese sai istória ida ba Timor.

“Ohin akontese eventu naturál ne’ebé mosu iha ita-nia, antes ne’e akontese iha beila sira-nia tempu liubá. Ida-ne’e oportunidade ida ba jerasaun sira agora no sai grasa boot ida ba ita hodi asiste no observa rasik tanba ba oin tinan naruk nian laran mak foin akontese tan,” Ministru José Lucas hateten iha suku Maluru, Beaço, munisípiu Viqueque, kinta ne’e.

Tanba ne’e, parte Governu kria programa iha Beaço no Com, Lautém, hodi fasilita abitante hamutuk ho turista sira akompaña eventu naturál.

“Travel sira koordena direita ho turista sira. Ami sei konfirma ho parte travel sira hodi hatene loloos turista na’in hira maka tama iha Timor-Leste. Ita sai responsável hodi simu ita-nia bainaka sira ne’e ho di’ak inklui sientísta sira hodi halo observasaun no halo dokumentasaun iha ita-nia rai-laran,” governante ne’e akresenta.

Notísia relevante : Ministru Turizmu relata preparasaun fenómena Solár Eklipse ba Primeiru-Ministru

Ministériu Turizmu Komérsiu no Indústria (MTKI) nu’udar instituisaun responsável Governu prevee $250.000 hodi halo preparasaun akompaña eventu naturál ne’e, enkuantu ministériu seluk prevee orsamentu rasik hodi hala’o atividade.

“Ami hahú koordenasaun fulan rua antes eventu, hanesan halo sosializasaun eklipse solár. Ami prepara mós baraka hodi tau kulinária produtu lokál hodi serve abitante lokál no turista sira, kompetisaun, pintura no espozisaun,” nia hato’o.

Iha fatin hanesan, Xefe suku Maluru, postu Viqueque Vila, Francisco Amaral, sente orgullu tanba bele akompaña eventu ne’ebé furak.

“Turista sira bele mai asiste eventu eklipse solár iha ami-nia suku. Ami sente kontente tanba bele akontese iha suku ne’e. Komunidade sira mós prepara hahán hodi serve ba ita-nia bainaka,” nia dehan.

Tuir observasaun Agência Tatoli iha terrenu nota katak iha suku Maluru abitante barak maka asiste hamutuk ho turista no astrónomu sira hosi nasaun Amérika, Austrália, Japaun, Malázia, França no Alemaña.

Biban ne’e, abitante no turista sira ne’ebé akompaña sente kontente no haklak bainhira mosu rai nakun iha minutu balun nia laran.

Eklipse solár parsiál iha Timor-Leste akontese durante oras 3 ho balun, hahú tuku 13:18 to’o ramata.

Enkuantu iha Viqueque rasik ne’ebé akontese ho persentajen frekuente disku solár 100%, ba eklipse solár totál akontese durante minutu 1 ho 14 segundu.

Jornalista     : Vitorino Lopes da Costa

Editora         : Julia Chatarina

iklan
iklan

Leave a Reply

iklan
error: Content is protected !!