iklan

COVALIMA, MUNISÍPIU

Konfrontu entre membru GAM iha Zumalai estraga motorizada hitu

Konfrontu entre membru GAM iha Zumalai estraga motorizada hitu

Komandante PNTL Munisípiu Covalima, Superintendente Basílio de Jesus. Imajen Tatoli/Celestina Teles.

COVALIMA, 20 abríl 2023 (TATOLI)—Komandante PNTL Munisípiu Covalima, Superintendente Polísia Basílio de Jesus, hateten konfrontu entre membru Grupu Arte Marsiál (GAM) iha postu administrativu Zumalai, munisípiu Covalima ne’ebé akontese iha kuarta (12/04) ne’e estraga motorizada hamutuk hitu (7).

“Atu informa ba ita hotu iha loron 12 fulan-abríl mosu konfrontu ki’ik la’ós grave maibé iha indikasaun ita-nia alin grupu arte marsiál hosi KORK, fila hosi Ainaro mai iha área Covalima ita nia militante Partidu mai hosi GAM PSHT halo asaltu malu, entaun ha’u rasik mak lidera hodi halo atuasaun nune’e laiha vítima grave maibé konsege estraga motorizada hitu (7),” Superintendente Polísia Basílio de Jesus hateten ba jornalista sira, iha salaun STAE Covalima, Kampung Baru, kuarta ne’e.

Komandante rekoñese GAM PSHT halo asaltu malu bainhira membru GAM KORK viajen hosi Ainaro mai iha Covalima konsege estraga motorizada hitu, balun kanek tanba monu hosi motorizada no balun hetan tuda.

“Ho akontesimentu hirak ne’e hanesan komandu Munisípiu Covalima ita enkamiña ona ba Ministériu Públiku tanba iha aktu krime asaltu malu mós hanesan aktu krime, baku motorizada entaun Ministériu Públiku mak na’in ba prosesu hotu, nune’e komandu Covalima prepara ona dokumentu atu enkamiña ba MP hodi hele prosesa kazu bazea ba lei,” nia dehan.

Antes ne’e, iha loron 12 abríl tinan 2023, Autoridade Protesaun Sivil (APC-sigla portugés liuhosi Diresaun Nasionàl ba Prevensaun Konflitu Komunitária realiza eventu Palku dame ba Grupu Arte marsiál iha postu administrativu Zumalai, munisípiu Covalima.

Iha eventu Palku dame ne’e simbolikamente hodi husik manu pombu ho sentidu atu garante pás no estabilidade durante iha kampaña eleitorál (19 abril-18 maiu 2023) to’o eleisaun parlamentár iha 21 maiu 2023.

Jornalista : Celestina Teles

Editór      : Cancio Ximenes

iklan
iklan

Leave a Reply

iklan
error: Content is protected !!